أنا والمنتدى وهواك !

هههههه
انا بصراحة اول مرة اعرف ان علل يعنى افطن
الحب افضل من الصداقة ده لو هنتكلم عن الحب اللى بجد بمفهومه الصحيح
لان زى ما قلت ما فيش حب من غير صداقة لان الصداقة جزء كبير اوى منه
وهى كمان مرحلة من مراحله

انا فى رأيي المتواضع ان الصداقه ممكن تتحول لحب لان الطرفين بيكونوا اتعرفوا على بعض اوى وكل واحد عرف مميزات الطرف التانى ايه وايه هى عيوبه وبيكون كمان عرف هو بيحب ايه وبيكره ايه فبكده هيكونوا الاتنين قريبين من بعض جداا حتى لو مش قاصدين بس هيكونوا عارفين عن بعض حاجات كده زى مابيقولوا خفايا او حاجات ممكن مش كل الناس عرفاها وممكن كمان تكون الصداقه هى اولى مراحل الحب زى ما نور بتقول يعنى صداقه وبعدين اعجاب وبعد كده الباقى بقى بس يعنى هى ترتيبها قبل الاعجاب يعنى قبل ما الموضوع يتحول لحب وكمان هى فعلا مرحله مهمه جدااا للطرفين علشان يتعرفوا على بعض اكتر ده بالنسبه للصداقه اللى ممكن تتحول لحب
اما بقى بالنسبه للحب اللى ممكن يتحول لصداقه فده مــســـتـــــحـــيـــل وانا عارفه ان الكلام ده صح مليون فى الميه لانه انا لما هحب حد هأبقى مش شايفه غيره تقريبا ومش شايفه فيه عيوب (مع انه احنا مش ملايكه كلنا بشر وكلنا عيوب) ومأعتقدش ان الطرف التانى لما يكون بيحبنى هأبقى أنا تقريبا كل حاجه بالنسبه ليه يعنى صديقته وحبيبته واهله وكل حاجه وحياته كلها هتبقى مرتكزة عليا وقايمه بيا فمعتقدش انه لما فى يوم من الايام اقوله اننا اصحاب وبس او العكس ممكن ده يحصل وانى ابقى حاجه فى حياته تانى ده قليل اوى لو كرهنى يعنى
وهو ده الوقت اللى انا بتكلم فيه انه ساعتها انا لا هأبقى صديقه ولا حبيبه ولا اى حاجه بالنسبه ليه الا بقى لو هو كان متسامح اوى يعنى وتقبل الموضوع ورجعنا اصحاب بجد من تانى ساعتها ممكن فعلا نكون اصحاب بجد او انه ممكن يكون راجع تانى علشان ينتقم او يرد لى القلم وده بقى ميستاهلش اى حاجه ممكن يكون الطرف التانى عملها علشانه وميستاهلش انه يكون انسان اصلا... معلش طولت عليكم بس الموضوع فعلا حلو والفكرة هايله يامصطفى زى ماعودتنا وبليز عاوزة اسمع اغنيه (لا بينا حلم لسميرة سعيد)

ميرسي على الرد التحفففففففة بجد يا ايناس نورتينا برأيك
ونسمع اغنية (لا بينا حلم) لـ سميرة سعيد ونرجع بعد الفاصل

يا اغانيك يا مصطفى يا اغانيك هههههههههههههه

بصوا بقى

الصداقة تتحول لحب دى كان عليها اتفاق فى الردود والناس كلها قالت بتحصل وانا رأى مع الجماعة ومش بس بقول انها بتتحول لحب لأ دا كمان هضيف من عندى ان ساعات الصداقة اساسا بتكون موجودة تمهيد للحب ( يعنى الواحد يتمسكن لحد ما يتمكن )

قصدى ان ساعات بيكون هدف الصداقة الاساسى التقرب للشخص بطريقة ميمانعهاش فى الاول ومنها اعرفه نفسى وشخصيتى ويكون فى فرصة لوجود الحب ( شوفتوا التفكير هههههههههههههههههههههه )

بس دا اكيد بيبقى هدف نبييييييييييييييييل جدا جدا معتقدش انه حاجة مش حلوة على الاطلاق ولا ايه يا جماعة ياريت بجد تبقوا تقولوا رايكوا فى الكلام دا او الاسلوب دا هو بجد حاجة مش كويسة ولا فعلا هدفه نبيل

تانى حاجة بقى يا مصطفى سؤالك عن الحب والصداقة بصراحة مش عارف اجوبه لانى مش شايف وجه مقارنى بين الاتنين لان الاتنين لا متعارضين ولا حتى متنافسين

بالعكس كل حاجة فيهم مستقلة بذاتها والاحسن ان احنا مندخلهمش فى بعض لان كل حاجة فيهم ليها مكانة فى نفس كل انسان مختلفة من واحد للتانى

وشكرا........

انا معاك يا طارق
لكن حكمى على ان سلوك زى ده نبيل ولأ لا

هيبقى من خلال العواقب والنتائج للسلوك ومفهوم الحب نفسه للانسان اللى قام بالسلوك ده
يعنى فلان بيحب وفلان بيحب وفلان بيحب
او فلان بيستغل الصداقة فى المصارحة بالحب والتقرب من المحب وفلان نفس الحكاية وفلان نفس الحكاية
فهحكم عليهم لما يوصلوا لهدفهم والكورة تبقى فى ملعبهم
واحد وصل لهدفه (الحب او المصارحة) فاخد حبيبته ولف بيها فى الكازينوهات فده سلوك غير نبيل بالمرة

واحد وصل لهدفه عشان تفريغ عاطفى مش اكتر فده برضوا سلوك غير نبيل

واحد استغل الصداقة ووصل لهدفه عشان يحافظ على اللى بيحبها وهى تبقى رقم واحد فى حياته وقلبه ويتجوزها
فهو ده السلوك النبيل

اجابة يا نور ولا اروع بجد

لا فعلا اجابة اشبعت السؤال بنسبة 100% وانا موافقك الرأى جدا

فى انتظار باقى الردود والاراء يا مصطفى ورأيك انت كمان عايزين نعرفه ولا انت بتسأل وبس هههههههههههه

بشكرك يا طارق على مرورك وردك الجميل وميرسي بجد
وميرسي يا نورعلى الاجابة الأكثر من رائعة وكالعادة منورانى برأيك

أما عن أجابتى عن السؤال فهجاوب يا عم طارق متقلقش
فى رأيى المتواضع ان الحب أفضل من الصداقه فى كونه إحساس لا أروع ولا احسن منه فى الدنيا أما عن الصداقه فهى تتميز بالأخوة والمشاركة والعشره و...... وانا عن نفسي أفضل الصداقة لأن لو زعلت من صاحبى هاجى واصالحه أو العكس لو هو الغلطان أما لو زعلت من حبيبتى أكيد هيبقى فى حساسيات فى الموضوع وحكايه الصلح دى بتعتمد على مدى القبول والعلاقه بين الطرفين ... يعنى ممكن تعوض صديق عرفته لكن مش ممكن تعوض حبيب عشقته (حته ع الماشي)
ولأسباب عدة أنا افضل الصداقه عن الحب لأنى بحس أن الحب بقى لعبة أو أنك تعيش اللحظة ومصالح
أما الصداقة فحتى اذا وجدت بها المصالح فأنها ككل علاقه حميمه تجمع الناس ببعضها على الحلوه والمره (زى ما بيقولوا)
ونسمع أغنيه أهداء خاص منى لكل صحابى وزمايلى ع المنتدى اللى اعرفهم واللى لسه هعرفهم

thank you
انا شايفة يا مصطفى ان الحب هيبقى مصالح على حسب الاطار اللى بيحيط بيه
يعنى لو الاطار شرعى ما عتقدش انه هيكون فيه مصالح
هو الموضوع عبارة عن تبادل مشاعر وقيم كتيرة

أولاً بشكر كل اللى بعتوا ردود ومتابعين معايا وبتمنى المشاركة من باقى الأعضاء
ثانياً موضوع الأسبوع هو (( الغـيــــــــــــــــــــــرة )) والغيرة هى الخوف الزائد
على الحبيب من الناس التى حوله هناك نوعان للغيرة البسيطة التى تكون فى الحدود
والقوية التى تخرج عن الحدود وقد تصل للشك من كتر الخوف على الحبيب وتصرفاته
والغيرة أيضاً ميزة وصفة أساسية فى الحب بين الطرفين وأن قلت الغيرة أنعدم الإحساس
وهى التى نحس معها بلوعة الحب والأشتياق والإحساس بالأمان .. منتظر رأيكم فى الغيرة

ونسمع تامر حسنى (بغير عليها) ونرجع تانى ... 

ميرسي يا نور ع المتابعة والتكملة الهايلة .. وفين بقيت الأعضاااااااء

لحد ما يجي الأتصال نسمع أغنية من أجمل ما غنى الهضبة عمر دياب (علمنى هواك)

انا هرد الاول فى موضوع الغيرة لانى ملحقتهوش
مهما كان فى ثقة بين الطرفين لازم الغيرة دى حاجه اساسية يعنى انا مثلا مستقبلا ان شاء الله لو اطول احط شريك حياتى بين اربع حيطان عشان ميشفهوش حد هعمل كده انا بجد حاسة ان غيرتتى هتبقى فوق الوصف حتى لو كان فى ثقة عالية جداااا
للحب وجهان الغيرة احدهما
بس احيانا الغيرة بتبقى فشل فى العلاقات لما تبقى زايده عن الحد ممكن تتهأ الواحد فى عشته وممكن تسبب انهيار العلاقات بين الناس لو كانت زايده جدا عن حدها ولكن الغيرة مطلوبة غالبا حتى بتدى نوع من التاكد من حب الطرف التانى ليك

NOUR كتب:

ارد ولا ماردش
على فكرة انا كنت عايزة اقترح عليك انك تعمل حلقة عن الخيانة بس مارضتش
عشان اقترحت قبل كدة وكبستنى ورجعت تقول يا جماعة انا منتظر اقتراحات الاعضاء
امال انا ايه مش من الاعضاء.......ما علينا ما علينا.... عشان ما تقولوش قلبى اسود...... خلينا فى موضوع انهاردة

الخيانة رغم انها مجرد كلمة واحدة لكن يندرج تحتها افعال كثيرة
زى
واهمها وارذلها الخيانة الزوجية وهى انواع مش نوع واحد لان كمان لما واحدة تحب واحد غير جوزها حتى لو ما فيش كلام بينها وما بينه ..فديه اسمها خيانة زوجية ... اعوذ بالله مش محتاجة اتكلم فيها كتير طبعا

وخيانة الصديق لصديقه عندما يفرض عليه ان ينصحه فلا يبالى
فديه خيانة لانه خان ميثاق الصداقة و ماحققهاش كما ينبغى ان تحقق
لما يتعامل مع صديقه على اساس المصلحة وبس ويقوله انا عايزك تبقى صاحبى وهو اصلا عامل على مصلحته
تبقى ديه خيانة

خيانة الابن لابوه او البنت لابوها وامها
لما تكذب على ابوها وامها وتتصرف غلط تبقى خيانة
لما تعرف شاب وتخبى عليهم لانها عارفة انها غلط تبقى خيانة

نقض العهد والميثاق ...خيانة
لما انقض العهد مع حد او ما وفيش بوعدى او انقض عهدى مع ربى او رسولى تبقى خيانة
ولما اضيع الامانة وما حافظتش عليه تبقى خيانة
وكمان الخيانة فى الشغل والعمل
يقول الله تعالى : ( يَا أَيُّهَا الَّذِينَ آمَنُوا لَا تَخُونُوا اللَّهَ وَالرَّسُولَ وَتَخُونُوا أَمَانَاتِكُمْ وَأَنْتُمْ تَعْلَمُون )

الكذب خيانة
الغش خيانة
لما اعصى ربنا واحط نفسى فى الطريق الغلط اللى اضر بيه نفسى فى الدنيا والاخرة لما انظر نظرة حرام او اكشف عورات ناس ديه كمان خيانة واسمها خيانة النفس
خيانة البلد مش بس ان اكون جاسوسة لحساب عدوها
لما اقول بحبك يا بلدى وماشية فى كل مكان ارمى زبالة
لما اقول بحبك يا بلدى وانا معرفش حاجة عن تاريخها ومعرفش ادافع عنها..... تبقى خيانة
الاسباب
مهما كانت الاسباب واللى بتكتر شوية فى نوع الخيانة الزوجية
بيبقى السبب الوحيد من الانسان ذاته هو اللى اخلاقه ومبادئه سمحتله بانه يتحجج باسباب او بدوافع معينة عشان يخون لكن فى الاصل الدافع الاساسى والسبب الوحيد بيبقى نابع من الانسان نفسه
وما فيش اى دافع خارجى مقنع يخلى الانسان يخون
الا كدة كنا سمعنا حديث يقول يوجد انواع من الخيانة غير محرمة زى الكدب مثلا فى مواقف معين عشان اصلح بين الناس او اكدب فى ان ماقولش اسرار الحرب
لكن الاسلام حرم الخيانة بكل وجميع اشكالها وانواعها

انا ممكن اسامح اللى خانى لكن مش ممكن انسى انه /انها فى يوم من الايام خانتنى ... ممكن استمر فى علاقتى مع الخاين على حسب علاقتى بيه قبل كدة وممكن لو استمريت مش هتبقى زى الاول

يعنى على حسب نوع الخيانة وقوة او ضعف علاقتى بالخاين وشخصية الخاين نفسه

لأ والله مكنش قصدى ولا أنا قلبى أسود خالص
والحكاية وما فيها أنك كنت عاوزة نناقش حب الوطن فى ثانى أسبوع بعد حب الله
ومكنش ينفع نحبكها اوى فى الأول وأكيد هناقش حب الوطن ولكن فى مناسبة أهم
وأديني فتحت موضوع الخيانة من غير ماتقولى وعديها بقى المرة دى
بس أكيد هستنى أقتراحاتك لأنك من الأعضاء المميزين وبجد بيسعدنى
جداااااااااااا مرورك وردك المتواصل على موضوعاتى وميرسي بجد لردك
الرائع والتفصيلي عن الخيانة بجد نورتيني يا نور

malak كتب:

انا هرد الاول فى موضوع الغيرة لانى ملحقتهوش
مهما كان فى ثقة بين الطرفين لازم الغيرة دى حاجه اساسية يعنى انا مثلا مستقبلا ان شاء الله لو اطول احط شريك حياتى بين اربع حيطان عشان ميشفهوش حد هعمل كده انا بجد حاسة ان غيرتتى هتبقى فوق الوصف حتى لو كان فى ثقة عالية جداااا
للحب وجهان الغيرة احدهما
بس احيانا الغيرة بتبقى فشل فى العلاقات لما تبقى زايده عن الحد ممكن تتهأ الواحد فى عشته وممكن تسبب انهيار العلاقات بين الناس لو كانت زايده جدا عن حدها ولكن الغيرة مطلوبة غالبا حتى بتدى نوع من التاكد من حب الطرف التانى ليك

أنتى تنوريني يا ملك فى أى وقت
وأنا أتضايقت أن محدش رد غير نور فى موضوع مهم زى ده
لو عاوزين أعيد الموضوع أعيده بس ألاقى أرااااااااااااااء وأفكاااااااااار وكده يعنى
وفعلاً الغيرة نوع من أنواع تأكيد الحب بين الطرفين لأن لو مش بيغير مش بيحب
أو إنسان بارد عاطفياً بس برضك لازم يبقى ليها حدود
يعنى نعرف أمتى نشد وأمتى نرخى ...

نسمع أغنية تحفة بجد لأمال ماهر (أيه بينك وبينها) تجمع بين الغيرة والخيانة !!

بص يا مصطفى انا شايفه ان الخيانه ده انواع
يعنى ممكن حبيبك يخونك بس مش مع شخص تانى
ممكن يخونك فى عهد ما بينكم وهو انكم تفضلوا احباب
وانه ممكن يكون خانك بكلمه من وراك انت متستحقهاش
وممكن يكون خانك بانه وعدك انه هيحافظ على قلبك
الخيانه بحاجات كتيره اوى اعرف ان لو حاجه حصلت منها انه مبيحبكش
وخاصه ان كلنا بنحاول نسامح ونعدى ولكن دايما لازم الواحد يحافظ على قلبه
لحد يستحقه وميلومش على الى خان ولا يلوم على نفسه اهم حاجه انه يفهم
ان الحب هو انسان بيمثلك تلت حاجات امان وثقه وحب لازم تحس معاه بامان ولازم تثق فيه
لانك بتسلمه كل حاجه فكرك وقلبك ولو طولت تديله روحك هتديهاله فلازم احتيارنا يكون صح
انا عارفه ومتاكده ان محدش فينا هيختار لنفسه انسان يخون ولكن فعلا فى حاجات الواحد
بيعديها بتكون مبينه انه خاين بس علشان بتكون متعلق بيه بتفضل متمسك بيه بس انا شايفه ان
قلبنا غالى اوى يستحق مننا اننا نقدره ومندهوش فى ايد اى حد يلعب بيه
الاصعب من الخيانه انك بتبقى نفسك تعرف حاجه واحده بس ليه ؟
ليه يخون ؟
انت كنت عايش معاه ومعيشه احلى حياه ليه يخلى حياتك وحياته تعيسه ويرجع يندم على ده
الصعب انك بتكون حبه ومش قادر تسامحه لانك مش لاقى حاجه تغفرله عندك
https://www.youtube.com/watch?v=1rxL0owBpoM

ميرسي ميرسي ميرسي يا مريم ع الرد الجامد ده
وفعلاً أحنا ممكن نتوقع أى حاجه من اللى بنحبه إلا الخيانة
لأنها بجد جرح صعب أنه يتغفر ولكن ساعات بنعديها عشان
الحب والعشرة وكده وكمان عشان منقدرش نخسر الأنسان
ده بس مش معنى كده اننا نتخان أكتر من مرة ونسكت لازم
يبقى فى وقفة من اللى هى كده

وعموماً نورتينا بأتصالك ومستنين منك الأراء الجميلة دى
فى المواضيع القادمة والأغنية حلوة جدا بس الترجمة هتنزل أمتى

نسمع الأغنية دى ونرجع تانى

هو مش المفروض أن الأسبوع اللى أحنا فيه ده فيه عيد الأم
طب أنا والنت قطع وكان عندى ظروف ربنا ما يوريكوا
أنتوا بقى
المفروض أننا بنكمل بعض والتوبيك ده بتاعكوا مش بتاعى لوحدى يعنى لو أتأخرت حد يطرح موضوع ونكلم فيه ...
يا جماعة المفروض يبقى في أهتمامات وتفاعل أكتر فى التوبيكات خاصة المتجددة لأن الزوار بيشتركوا فى المنتدى لما يلاقى حاجات جميلة وروح أخوة زى زمان ودلوقت موجودة برضك بس كلوا بينشغل بموضوعة أو بيحاول يخليه فى المقدمة وفى أعضاء بيبحبوا يكون أسمهم فى كل مكان فى المنتدى طب ليه .. المنتدى ده بتاعنا كلنا مش لعضو واحد أو أثنين هما اللى يردوا على كل الموضوعات
أنا عارف أنى خرجت عن موضوع التوبيك بس كان لازم أتطرق للموضوع ده وموضوع حب الأم الذى هو أجمل وأول وأروع قصة حب فى الدنيا مازال مفتوح .....
يعنى عاوز أعرف جبتوا أيه فى عيد الأم لماما ومحدش يقولى جبتلها الضغط
وأيه أجمل موقف عشته أو عشتيه معاها وكل حاجه عاوزين تحكوها ....

وأتمنى تكون رسالتى وصلت !!

حلوة أحم دى وواضح أنك مهنياها يا نور
وميرسي لردك الجميل جدااااا ومش شرط أجمل موقف
ممكن أكتر موقف بين عظمة الأم عندكوا وزى ما قلت أى حاجه عاوزين تحكوها ...

نسمع أمى ثم أمى للمجموعة ونواصل بعد الفاصل