السلام عليكم: الموضوع دا أتمنى أنه يعجبكم. والموضوع شخصي في الدرجة الأولى وأكيد انتوا بيحصل معاكم كده. الجميل ان الناس تعرفني باسمي الأول يعني الواحد يعمل لنفسه اسم بس اسم كويس بحيث الواحد يكون مشهور بس مشهور في الحاجات الكويسة مش الحاجات الوحشة يعني ميكونش مشهور بالاذى أو النمردة او المنظرة او الاجرام اصل بلدنا غالبا المشاهير اكثرهم من المجرمين والساقطين اسالوا الممثلات والمطربات والمطربين مثلا اللي زور شهادة الجيش والبنات كلها بتموت عليه وبعد كده يطلع على بوستر انه مشوار في حب مصر ازاي واحد بيتهرب من خدمة بلده ويكون بيحبها اكيد هو دا حب مصر من وجهة نظرهم انك متكونش مصري. واسالوا الراقصات المشهورات في رقصهم وفي افلامهم وفي حياتهم الزوجية اللي بتكون في كل بيت بعدين. المهم انك تكون مثلا عادل بس دا شيء كويس وان الناس تعرفك باسمك الاول فقط دا شيء جميل وتكون لك مثلا علامات معينة الناس تعرفك منها. لكن الاجمل ان الناس تعرفك باسمك الثنائي اسمك الاول واسم والدك او لقب العائلة انا باكون مبسوط جدا لما الناس تتكلم عن عادل ابراهيم باحس بقيمة الاب اللي اداني اسمه ومن خلاله بقيت معروف . الاحساس دا حسيته من الشهادة الاصلية لما استلمتها من الجامعة وشهادة الماجستير مكتوب فيها عادل ابراهيم بن السيد ابراهيم يومها حسيت اني والدي لسه موجود في الحياة لأن اسمه موجود من خلالي .
ياريت لما نيجي نتعرف على اي حد ان احنا نقول اسمنا واسم العائلة او الاب صدقوني نطق هذا الاسم بيكون جميل جدا وربنا يسهل ونكون كلنا مشاهير في الخير طبعا باسمائنا الكاملة ومنغيرش اي اسم فيها لزوم الشهرة حتى اسالوا معظم الفنانين هي اسمائهم الحقيقية ايه؟ لكن انا يشرفني ان اسمي عادل ابراهيم وانتوا اكيد يشرفكم نسبتكم لآبائكم حتى اسالوا ريم واسراء وشهرتهم باسمائهم الكاملة . فعلا انا باتعلم منهم كتير وبالذات في تمسكهم باسمائهم الكاملة مش زيي انا عادل وبس في الاول يعني عادل دا يطلع مين هههههههههههههه؟ لكن عادل ابراهيم واحد له وجوده بوجود اسم والده معاه . وسلام بقى
عادل ابراهيم
الخميس أغسطس 13, 2009 5:07 pm
