الموضوع فیه جزء بأسلوبي زي المقدمة مثلا وفيه منقول خاصة التصريحات والاحداث الدقيقة اللي وردت علي لسان ماهر موسي شقيق سميرة موسي وانا نقلتها زي مااتكتبت في مجلة نصف الدنيا في تحقيق قام بإعداده عمر طاهر من خلال مقابلة مع ماهر موسي واسرته في منزل سميرة موسي المتهالك اللي قام ببناءه الخديوي توفيق وهو منزل رقم 1 بميدان العتبة ..ودي كانت المرة الاولي اللي تتكلم فيها اسرة العالمة سميرة موسي عن تفاصيل حياتها وتفاصيل وفاتها منذ اغتيالها ..وانا حبيت انقل التفاصيل دي لانها لم تنشر من قبل او لان كل ما كتب عنها كان سطحي وعام ..وانا نقلتها للافاده وبالتفصيل عشان كل اللي يقرأ الموضوع يحس فعلا بقيمة الانسانة اللي للاسف في كتير ميعرفوهاش ..وكمان مقدرتش اكتب الموضوع كله باسلوبي لضيق الوقت ..وكان هدفي الاول هو ان الكل يعرف مين هي سميرة موسي..اما الجزء التاني فهو موجود في المنتدي وكاتبه المصادر فيه بس الحقيقة العدد معرفش هو الكام لانها قديمة والغلاف مش لاقياه ..والتحقيق ده هو اللي حببني في الشخصية دي لأني حسيت قد ايه هي مظلومة ..اتظلمت يوم ما رجعت مصر محنطه في صندوق بلاتيني ..اتظلمت يوم ماادفنت فوق الارض بخلاف البشر كلهم ..اتظلمت يوم ما بلدها استهانت بحقها ومدورتش عن القاتل الحقيقي ..اتظلمت يوم ما بلدها نسيت تكرم اسمها او تخلده بانها تطلق اسمها علي اي مدرج او معمل اللي كان هو امنية حياتها ..اتظلمت يوم مانسيتها الصحافة في انها تكتب عنها من سنه 1957ما هي مش بنت ليلي غفران عشان الصحافة تتقلب عشانها..اتظلمت يوم مانسيها الاعلام واستخسروا يعملوا ليها فيلم او مسلسل ما هي مش سوزان تميم اللي اتقلبت الدنيا عشانها واللي فورا بيتعملها فيلم يخلد حياتها التافهه اصل حياتها كانت مليئة بالمتاعب فعلا تعبت من كتر الرقص ..اتظلمت يوم مانسناها احنا كشعب ويوم مانسيها الشباب وافتكر سوزان تميم وامثالها ....
علي العموم اتمني اني اكون سبب بسيط في ان الشباب يعرف الشخصية دي اللي ضحت بعمرها وهي بتحاول تخلي علاج السرطان زي العلاج بالاسبرين وازاي تخلي القنبلة النووية مجانية في الوقت اللي شبابنا فيه مهتم ب....؟؟؟!!!!