جيفارا مات
جيفارا مات
اخر خبر فى الرديوهات
وفى الكنايس وفى الجوامع
وفى الحوارى والشوارع
وع القهاوى والبارات
جيفارا مات .......جيفارا مات
وامتد حبل الدردشة والتعليقات
مات المناضل المثال
يا ميت خسارة على الرجال
مات الجدع فوق مدفعةجوه الغابات
جسد نضاله بمصرعه
لا طبالين يفرقعوا ولا اعلانات
ما رائيكم دام عزاكم
يا انتيكات يا غرقانين
فى الماكولات والملبوسات
يا دفينانين ومولعين الدفايات
يا محلفطين يا ملمعين يا جيمستات
يا بتوع نضال اخر زمن
فى العومات
ما رائيكم دام عزاكم
جيفارا مات
لا طنطنة ولا شنشنة
ولا اعلامات ولا استعلامات
عينى علية ساعت القضا
من غير رفقه تودعه
يطلع انينه للفضا
يزعق ولا مين يسمعه
يمكن صرخ من الالم
من لسعة النار فى الحشا
يمكن ضحك ....او ابتسم
او ارتعش .....او تنشىء
يمكن لفط اخر نفس كلمة وداع
لجل الجياع
يمكن وصية للى حضنين القضية بالصراع
صور كتير مالوا الخيال والف مليون احتمال
لكن اكيد ولا جدال
جيفارا مات موتة رجال
يا شغالين ومحرومين
يا مسلسلين رجلين وراس
خلاص خلاص مكلكوش خلاص
غير البنادق والرصاص
دا منطق العصر السعيد
عصر الزنوج والامريكان
الكلمة للنار والحديد
والعدل اخرس او جبان
صرخة جيفارااااااااا يا عبيد
فى اى موطن او مكان
مافيش بديل مافيش مناص
يا تجهزوا جيش الخلاص
يا تقولوا على العالم خلاص
احمد فؤاد نجم .......
الإثنين أغسطس 10, 2009 11:20 pm
