مواقف تكسف جدا

السلام عليكم: النهاردة هنتكلم عن المواقف اللي الواحد بيتعرض لها في حياته اليومية وممكن تكون محرجة أو تكسف وساعتها الواحد بيكون نفسه الأرض تنشق وتبلعه أو إنه يستخبى حتى لو يدخل في الحيطة اللي جنبه عشان ما حدش يشوفه وهو كده. طبعا في حاجات تكسف بدون إرادتنا بس بتكون محرجة زي مثلا وأي حد ماشي فينا ممكن قميصه يشبك في حاجة تقطعه أو بنطلونه عجلة تخبط فيه فيتبهدل والبنات في المواقف اللي زي دي جاهزة بإبرة الخياطة في شنطتها أو عربية تعدي علي مياه فتغرق لك هدومك أو حد بيرش فيغرقك. هتعمل إيه ساعتها هتزعق شوية بس هتمشي وسط الناس وأنت مبلول أو أنت بنطلونك أو قميصك مقطوع شكلك هيموت من الضحك.
وممكن واحد عاوز يعمل فيك مقلب فيشيل الكرسي قبل ما تقعد فتقع وأصحابك واللي حواليك يضحكوا على منظرك أو حد يركب لك ديل فتمشي بيه في وسط الناس من غير ما تحس دي بجد مواقف بايخة ومحرجة بس تكسف . وممكن وأنت ماشي تخبط في عمود أو تنزل غلط من على السلالم فتتدحرج تقع أو تطلع السلم غلط فتقع على سنانك مواقف بايخة كتيرة ولكنها لا إرادية بس تكسف برضه. وممكن سعادتك تروح تكلم بنت فتمشيك قفاك يقمر عيش وتبقى زي الكتكوت المبلول أو تتنصح على المدرس بتاعك فتطلع إجابتك غلط وكل الناس تضحك عليك. طبعا كلنا عدينا بمواقف تكسف كتير وويا ريت كل واحد يحكي لنا عن موقف واحد وصدقوني هنضحك بصوت واطي عشان ما حدش يزعل مننا وأنا هأبدأ بنفسي شخصيا اسمعوا بقى:
كنت مرة مع أصحابي في الكلية كنت معيد وهما كانوا اتخرجوا بس جم يزوروني المهم انا نزلت أقعد معاهم تحت أدام الكلية وعمالين نهزر مع بعض فأنا بأغلس على واحد منهم فواحد تاني حب يسكتني فمعرفش فقام عشان يكلمني فجريت منه وانا بأجري منه خبطت في عمود بدماغي الخبطة كانت جامدة لدرجة إن اللي علي الرصيف التاني سمعوها وفضلوا يضحكوا وهما مش عارفين إني الخبطة ممكن تؤذيني ولكن الحمد لله كانت الخبطة بعيدة عن عيني بكام ملليمتر بدون مبالغة ولكن صاحبي اللي كان بيجري ورايا جاب لي تلج وحطيته علي عيني بس اسمعوا بقى التعليقات تعيش وتاخد غيرها، أنت بتفكرني بموقف معين. انت بتفكرني بإنسان حصل معاه كده. كمان عينيا ورمت وازرقت واحمرت فالموقف كان عنب أوي وكنت مكسوف أوي ساعتها.
أوعوا حد يضحك عليا بصوت عالي. اتفقنا نضحك بصوت واطي ويا ريت انتوا كمان تقولوا لنا على مواقف زي دي .
وشكرا لحسن تعاونكم
عادل إبراهيم

هههههههههههه بضحك بصوت واطي مش عالي عشان محدش يسمع
جميل يا دكتر عادل الموقف تحفه ههههههه
انا بقي حصل معايا موضوع ان عربية تعدي وتغرقك ميه..ده حصل معايا السنه اللي فاتت او الشتا اللي فاتت يعني كنت في الجيزة وانا رايحة الجامعة عند مدرسةامير الشعراء ..وكنت رايحة اقابل اسراء والتوامتان مني ومنال (ورقة شجر وعشق الجمال) كنا رايحين معرض الكتاب ..وكنت فرحانه قوي ان رايحة المعرض ولبسي نضيف وفجاة حصلت الكارثة عدت العربية والجيبه غرقت ميه ههههههههه واللي يجنن انه وقف بس عليا وفضل يضحك ههههه انا اتغظظظت ومعرفتش ازعقك كل اللي قلته يا غبي وتنحت هههههه والناس بقي اللي في الشارع فضلوا يضحكوا وكل اللي رايح واللي جاي يبص عليا ويضحك ويقولي تعيشي وتغدي غيرها واللي عايز يساعد كتر خيره ورايح هو يجيب منديل وميه وهو اللي هايعملهالي ههههههههه بيصطادوا في الميه العكره ..طبعا هزقته كل ده وانا واقفه متنحه وببص علي الجيبه ..رحت الجامعة وغسلتها ..طبعا الثلاثي المرح اللي معايا مصدقوا ونزلوا تريقه لان الجيبه بقت مبلوووووله بس الحمد لله كانت غامقه مكنتش باينه قوي ..واللي تقولي شكلك معفن قوي ..متمشيش معانا ..مين دي ولا اعرفها ويضحكوا طبعا وانا متغاظه لحد ماالجيبه نشفت ..وبعدين انا اللي بقيت اضحك علي نفسي ..وعدي اليوم وكان يوم جميييييييييييل

بصوت واطي اهو هههههههههههههههههههههها
بس يا ريم انا مش فاكره الموقف ده امتي حصل
افتكر اني حصل لي موقف قريب
كان علي كوبري قصر النيل بتاع الأسدين ده
كنت ماشيه عليه مش عارفه كنت بفكر في ايه بالظبط بس فاجأة لاقيت اتوبيس معندي من جمبي وانا سرحاااااااااااااانه وكان صوته عالي شويه وهو ماشي
وانا وهو معدي من جمبي اتخضيت واتنفضت وانا ماشيه زي ما يكون فيه دزننور هههههههههههههه معدي من جمبي وراحوا الركاب بتوع الأتوبيس اعدوا يضحكوا عليا
والناس اللي كانوا ماشين ورايا علي الكوبر وقدامي
لا والمصيبه ان الكسفه كانت عالمية ههههههههههههههه انترناشيونال اصل كان فيه اجانب ماشيه علي الكوبري ربنا يستر ومتكونش اتعرضت علي السي ان ان
بس ساعتها اتحرجت اوووووووووي

صباح الفل يااسراء ..\

ولا انا كمان فاكراه يااسراء ههههههههههههههههههههههههه

انا بقي مره حصلي موقف او ده اللي جه في بالي وانا بقرأالموضوع ده
كنت في اولي جامعة وكنت رايحة لواحده زميلتي في حقوق وكان معايا صحبتي وطبعا لسه اول سنه ليا في الجامعة ومش عارفة اي حاجة فيها المهم دورت كتير علي مدرج صحبتي لحد ماقالولي المدرج فوق طبعا بعد ماتعبت وانا ماشية ولسه هاطلع علي السلم اتخبطت في واحد خبطه جامدة لزقت فيه ولسه بقول له انا اسفة لقيته بص لي من فوق ل تحت وصحبتي ضحكت عليا فاتكسفت جامد اوووووووووووووي ساعتها

كويس برضوا انكوا مش فاكرين

علي فكره انا فاكره الموقف ده ياريم باماره اليوم ده قعدت اتريق عليكي باين كده انا اللي كنت نازله معاكي بس كانت تقريبا الجيبه متغرقه من الاطراف خلي بقي الشمس تنشفهالك انا بضحك اهو بصوت واطي انا بقي حصلي كذا موقف مره رحت حديقه الحيوان مع اصحابي وقلنا اول حاجه نخشها هي المراجيح اللي هناك هو انا مقدرش اقول عليها ملاهي لانها مش ملاهي دي مراجيح الاطفال بس برده دخلنا وتمرجحنا جوه كان شكلنا وحش بنات كبار داخلين يتمرجحوا والناس كلها قاعده تتفرج علينا بس وانا بتمرجح المرجيحه اللي بتطلع وبتزل الشنطه وقعت مني المشكله بقي اني استني لغايه مااللعبه تقف وانزل اجيبها لكن تعملوا ايه بقي في المخ نزلت اجيبها واللعبه شغاله في الوقت ده محستش بنفسي اتخبطت حته خبطه في الحديده عيني ورمت وبقت زرقه بقت حالتي حاله واصحابي بقي قالولي ايه اللي انتي عملتيه ده معلش تعيشي وتاخدي غيرها ده موقف الموقف التاني كنا في مره خارجين انا وتؤامي وريم واسراء وواحد صحبتنا تانيه اسمها تيسير رحنا القلعه ومسجد السلطان حسن ومسجد الرفاعي بس اليوم ده كان شكلنا فضايح بجد الناس كانت قاعده تبص علينا ومستغربنا اوووووي مش عارفه ليه كانت شمسيه ريم بتطير في الهوا كنا حاسين ان هي هترفعنا معاها وتطير وكان لونها بمبي بس كنا مشايين فرحانين جدا وبعد ماروحنا مسجد الرفاعي والسلطان حسن قولنا نروح ناكل وبعد كده نطلع القلعه عرفنا ان القلعه بتقفل 4 وكانت الساعه تقريبا 2 قلنا خلاص نطلع القلعه وبعد كده نروح ناكل المشكله بقي ان احنا مشينا من مسجد السلطان حسن لغايه القلعه علي رجلينا والطريق كان طويييييييييييييييييييييل والحقيقه اتكسفنا من نفسنا قولنا احنا ليه مركبناش بس احنا كنا عاوزين نحس بالمكان ونعيشه جزء جزء لكن كل ده جه علي دماغنا وقعدنا نتريق علي بعض جامد في اليوم ده جالنا ضربه شمس وصداع ورجلينا ورمت وكان في ناس اجانب لقيناهم هناك في مسجد السلطان حسن والمهم انهم خرجوا معانا فهما ركبوا ووصلوا وشافوا القلعه المشكله بقي واحنا لسه هنخش القلعه لقيناهم ماشيين مروحين بصينا لنفسنا وتنحنا حتي واحنا طالعين القلعه قاعدين نتسند علي بعض وقلنا يريتنا كنا ركبنا

اولا انتي فعلا قلتلي خلي الشمس تنشفها ووقفت في الشمس ..بس هما كانوا معااااااااااانا وهما ناسين ..حتي نصك التاني فضلت تقولي انا مبحبش استني اتاخرتي ليه
ثانيا بقي يوم مسجد الرفاعي ده انا فعلا كان نفسي اموتكووووا اولا لاني كنت جعاااااااااانه وبرضوا قولتوا نروح القلعة الاول قلت مش هاينفع ناكل ونمشي اصريتوا ..
ثانيا بقي والاهم ..تعالوا نركب يا جماعة ..ياريم دي قريبه خلينا نتمشي ..يالا نركب ..امشي ياريم والاجمل من كل ده انكوا استغلتوني واخدوا الشمسية وانا اللي مشيت من غير شمسية ..اها يا دماااااااااااااغي
ولما جينا بقي عند القلعة مكناش قادرين نطلعها احنا زحفنا لحد فوق هههههههههه
ولا في النزول هااا فاكرة

فعلا شكلنا كان شكل الشحاتين وخصوصا واحنا رايحين نريح في مسجد القلعة ..كان فاضل نمد ايدينا والناس اتفرجت علينا كانت هدومنا اتبهدلت اوي
كنا شبه اسري الحروب ههههههههه فعلا انا كنت مكسوفه قوي في القلعة واتخنقت في اخر اليوم
وروحت من غير اكل وكنت هموت من الجوووووع .. دي مكنتش خروجه ..ده كان عذاب ..حكم وبنفذه
اياك حد فيكوا نكون سوا ويمشي كلمته هاقتله ..سامعين

متزعليش مني ياقمر انتي عارفة اني بهزر معاكي وطبعا انتي متقدريش تزعلي مني
وبالنسبه للشمسيه انتي اللي سيبتهالنا مفروض كنتي دافعتي عن حقك وخديها مننا هههههههههههههههه
وبالنسبه للشحاته فاكرة في مسجد الرفاعي لما اتصورنا واحنا بنشحت ولا لما كلكوا متوا ومني هي اللي فضلت صاحية كان شكلكوا عااااااااااااااار

هاهاهاهاها بجد مواقف تموت من الضحك
أنا مش بضحك بصوت عالى والله دانا حتى عملها فيبريشن
بس بجد أجمد موقف موقف إسراء خصوصاً أنها بتتخض من أقل حاجه حتى بصوا بخخخخخخ
وموقف ريم حلو بس باااايخه أوى أنك تمشى مبلولة ... بهزر هتضربى ولا أيه
والتوأم بقا مواقفهم حكااااية وبجد أجمل حاجه الصداقة اللى بينكوا كلكوا ربنا يخليكوا لبعض
أما أحلى مافى الحوار نقطة الموضوع دكتور عادل لما العمود عمل تنننننن
أنا بقا أكتر موقف محرج أتعرضتله كان السنة دى فى الجامعة فى محاضرة ENGLISH لما الدكتورة وقفت المحاضرة مرة واحدة بسبب صوت الضحك بتاع زمايلى علشان قلت أفيه جامد وأنا بصراحه أفيهاتى ملهاش حل ولقيتلكوا الدكتر بتقولى أنت GO OUT طبعاً أنا عملت من بنها وسبت اللى قدامى كلهم يتورطوا فى الحوار الأول اللى قالها أنا واللى قالها وأنا عملت أيه المهم جه الدور عليا فوقفت وقلتلها أنا قالتلى أأأأيوه قلتلها طب ليه قالتلى أفترى قلتلها شكرنننن ولبست النظارة ونزلت بكل شياكة وبرود وأنا حاسس أن منظرى وحششششش بس خدتها بشياكه وقلت أوك يا دكتور ومرت الأيام وأفاجئ الترم الثانى بأن الدكتورة توفت وزعلت جداا من نفسى وحسيت بالذنب بس أكتشفت أنها كانت بتطرد نصف الدفعة بس بصراحة كانت أنسانة كويسة ومحترمة ربنا يرحمها وتسامحنى ... سورى نكدت عليكوا بس ده الموقف اللى أفتكرته وحبيت أقولكوا عليه وأعترف بالغلطة بس يااارب تسامحنى ... أدعوا لى وأعملوا الضحكة سايلنت