غيرة وشك ...........................

هي : طالبة في 2 جامعة .. بنت من عيلة كويسة و اسرتها مستريحة ماديا ..
هو : طالب في اخر سنة .. من عيلة معروفة و مستواهم المادي (ما شاء الله) تمام و واد جامد كده و مقطع السمكة و ديلها ..

حكايتهم ابتدت من غير مايكونوا شافوا بعض قبل كده ..
حكايتهم ابتدت بالارتباط التقليدي ( صالونات ) ..
البنت مؤدبة و محترمة و بنت ناس .. رشحتها والدة هو ليه .. و قالتله إيه رأيك ؟
هو .. كان عايز يبطل لعب العيال اللي كان بيعمله .. و عايز يهدي و يعقل كده ..
عجبته البنت و قرروا يتقدموا ليها .. و الموضوع ماخدش وقت كبير و ارتبطوا بقراية فاتحة و شبكة ..
من هنا بدأت علاقة الحب بينهم ..
هي .. كانت اعجبت جدا بهو ..
ولد لذيذ .. دمه خفيف .. كلامه حلو .. و راجل لأنه دخل من الباب ..
هو .. كان شايفها اول حاجة بجد في حياته .. حلاله .. محترمة و بنت ناس .. غير اي بنت عرفها قبل كده ..

مع مرور الوقت .. بدأوا يحبوا بعض اوى .. و بدأوا يقربوا لبعض اوى ..
أهل هي قبل ما يكتبوا شروط القران ..
كانوا بيسمعوا عن هو إنه شب طايش شوية و كان يعرف بنات و كده ..
و بسبب ده طلبوا مؤخر 75 الف جنيه ..
هو .. قال لأهله وافقوا .. انا شاري البنت ..
وافقوا و لو إن في عرف بلدهم المبلغ كبير ..

في اول حبهم كان الولد ده لسا بيعرف بنات .. لسا بيتسلي ..
هي .. كانت بتعرف إنه بيعمل كده ..
و واجهته .. قالتله انا عارفة إنك تعرف بنات و متحاولش تنكر لأنى انا اعرف واحدة من اللي تعرفهم ..
لو بجد بتحبنى و بتتقي فيا ربنا .. إنهى علاقتك بيهم ..
هو : اعتبريهم إنتهوا ..
هي : لأ دلوقتي قدامي ..
و مسكت موبايله .. و طلعت الأرقام بتاعة البنات حتي اللي بالرموز ( مش عارف إزاي عرفتهم) ..
وقالتله : يلا ابدأ و سمعنى ..
بدأ هو .. بنت ورا بنت .. وكان في موقف لا يحسد عليه الصراحة ..
و هي كمان .. سمعت كلام حرق دمها .. و قاعدة جنبه و نازلة فيه ضرب و قرص ..
و بالفعل هو انهى كل علاقته بالبنات اللي كان يعرفها في ظرف يومين .. و قدامها ..
و قالتله : انت ازاي عايش كده و ازاي شايل في حياتك كل دول ..
قالها : خلاص بقي ما انا سبت كل دول عشانك إنتي و اوعدك من انهاردة إنتي الأنسانة الوحيدة اللي هتبقي في حياتي لحد اخر يوم في عمري ..
حبهم لبعض كل يوم بيزيد ..
و في الوقت ده .. بنات كتير اصحابها و قرايبها عرفوا إنها اتقرت فتحتها علي هو ..
و علي هو بالتحديد ..
و طبعا لأن البنات مش وراها غير الرغي .. و دي تحكي ل دي و اللي تبدأ تخلق حكايات و اللي .. واللي ..
المهم ..
بدأ يوصل لهى كلام تانى عن هو من بنات كان يعرفها .. و هو كان بيقولي كذا و عملنا كذا و خرجنا كذا .. مصممين يبوظوا حياته ..
هي بدأت تتعب اوى من الكلام اللي بتسمعه ..
و بدأت تتأثر و بدأت حالتها النفسية تبقي وحشة و علي طول في عياط و الكلام وصل لأهلها ..
بدأت تسأله .. و قالها : والله انا قطعت كل علاقاتي و انا وعدتك إن خلاص انا ليكي بس .. سيبك من كل حاجة بتسمعيها الناس مش وراها غير الكلام و ياريت نصه صح ..
لكن هي مع نفسها .. بدأت تسأل : يا ترى هو ممكن يرجع في يوم للي كان فيه ..
و يعرف بنات و يحب بنات ..
يا تري اثق في كلامه إنه بجد إرتباطه بيا دي بداية حياته .. ولا دي بداية من اكتر من بداية في حياته ؟!


================================

لحد هنا حكايتنا وقفت ..
يا تري لو كنتي مكان هي كنتي هتثقي فيه و تكملي ولا هتعملي إيه بالظبط ؟؟

================================

انتى بتسألى البنات ياروميساء ولا عامة ؟؟

لو تسمحيلي اقول رأيي لأن الموضوع شد انتباهى
أولا سورى يعنى تتحرررررررررق الناس وكلام الناس مش وراه غير خراب البيوت
ثانيا الولد اللى يعمل حركة الموبايل دى بجد استحاله يرجع يكلم بنات وعن ثقه طالما حبها للدرجه دى لازم تثق فيه وتكبر دماغها اكتر م كده وتنفض خاااااااالص للناس والبنات دى اللى غاويه تزن ع عشها

وتقبلى مرورى مع جيزل الاحترام والتقدير

لاسورى قصدى عامة وميرسى لمرورك مصطفى
وانا متفقة مع رايك ميرسى كتيييييييييييييير ليك