كويس يا زينب أنك فتحتى الموضوع ده لأنى كنت عاوز أناقشه بس مكنش ينفع أنا اللى أعمله
التدخين عادة سيئة وللأسف أنا مدخن
وأنا قرأت أضرار كثيرة جداااا عنه اللى أنتى نشراها دى متجيش حاجه أدامها وبجد حاولت أبطلها أكتر من مرة وللأسف رجعتلها تانى لأنى مكنتش بطيق حاجه فى الدنيا وكنت ببقى مخنوق ومصدع وحاسس أن فى حاجه ناقصانى بس أحب أوضح حاجات مهمة للناس
أولاً:التدخين مش ضعف شخصية ولا هروب من المشاكل والواقع ولا لامبالاه من المدخن لأنه مش مخدرات ولا هيروين ولا حتى رجولة لأنه لو الرجولة بالسيجارة كان القرد أرجل
بس الموضوع عاده مش أكتر . الواحد لو شرب سيجارة ودخلت دمه والنيكوتين ثبت فى جسمه المخ بيتوقف عن أفراز النيكوتين الطبيعى لحد لما المدخن يبطلها لمدة سنة والجسم أو المدخن مش بيبقى فى حالته الطبيعية زى ما قلت لما بيبطلها وبتظهر أعراض زى الصداع والأرق وعدم التوازن والعصبية الزائدة وأنا مجرب كل ده وعلى فكرة يا جماعة كل الكلام ده كلام علمى
ثانياً:حكايتى مع التدخين أن والدى مدخن فظيع وكان عندى حب أستطلاع جامد وبسأل نفسي أسأله كتير زى هو بيشرب السجاير ليه طب بيستفاد أيه طب بتعمل أيه
وفى مرة وأنا فى 2 إعدادى كنت ماشى مع صحابى وكلهم بسم الله ماشاء الله مدخنين وقعدوا يقولولى أشرب دى جامدة أنت كده مش راجل متمشيش معانا وبصراحه كنت لسه طيب وبرئ ومعرفش حاجه وكمان عرفوا يستفزونى مع حب الأستطلاع اللى كان عندى جربت وعجبتنى أول مرة وشربتها بس خفيف وممكن سيجارة كل فين وفين لحد لما دخلت ثانوى بطلتها لحد 3 ثانوى رجعتلها بجد حاجه فظيعة وقولت لوالدتى بصراحة لأنها أقرب واحدة ليا وصاحبتى جدااا
وأحسن ما تعرف من برة وهى طبعاً رفضت الموضوع ده تماماً وقالتلى بطلها بس مقدرتش لأنى كنت بشرب تقريباً علبة أو أكتر يعنى شربتها سنتين وبطلتها سنتين بس دلوقت الحمد لله بقللها جداً لدرجة أن العلبة ممكن تقعد معايا يومين وثلاثة ونفسي أبطلها وحاولت كذا مرة بس أكتر مدة من ساعة ما رجعتلها فى 3 ثانوى كانت 10 أو 15 يوم بالكتير وبجد نفسي أبطلها بس مش عارف وأتعودت عليها وكل الناس شافتنى بيها وعلى فكرة هى حاجة ملهاش لازمة وخنيقة بس لو كنت أعرف ده من زمان مكنتش شربتها أصلاً بس بعد أيييه
بعد ما النيكوتين بقى فى دمى وبقت حاجه طبيعية بالنسبة ليا والناس اللى أعرفهم بس بجد بنصح أى حد عنده أطفال فى مرحلة أعدادى أو حتى إبتدائى ينصحهم وده اللى أنا بعمله مع أخويا الصغير وأكتشفت أن مش إعدادى بس مرحلة الفساد ده حتى إبتدائي بقت زفت ده مرة أخويا راجع من المدرسة بيقولى واحد صاحبى معاه فى 4 إبتدائي شرب سيجارة وهو ماشي معاه
أنا أتصدمت وحسيت أن السجاير بقت خطر عالمى مهول بيهدد البشرية الأمر الذى يتعلق بتقدم المجتمعات وأزهارها وهذا دمار شامل قد يؤدى إلى نهاية المجتمعات بل والعالم
وفى النهاية أتمنى أن أكون عند حسن ظنكم وبجد اللى يعرفونى من زمان عارفين أن مصطفى متغيرش ولا أخلاقه ولا تربيته المحترمة حتى بعد التدخين وعلى فكرة دى مش أكتر من سيجارة وضررها جسمى وليس أخلاقى ومعذرة للإطالة