ايه ده إيناس انا؟؟؟
اولا: شكراااااا يا مرمر على دعوتك ليا وبجد دى اجمل دعوة اتبعتتلى للعشاء فى يوم من الايام وانتى كمان وحشانى جدااا وما صدقت انك بعتيهالى بصراحه علشان نقعد مع بعض شويه...
ثانيا: دى حاجه بسيطه كده (مينفعش الواحد يروح يتعشى مع حد لأول مرة وايده فاضيه
) لا ومش اى حد دى مريومه بحالها
طيب علشان مأتكلمش كتير الاكل جاهز؟؟؟
1_هل تحب تشرب شئ قبل طلب الطعاااام ؟؟
لأ انا مش بحب أشرب حاجه قبل الأكل علشان لو شربت مش هآكل مهو يا أكل يا أشرب ههههه وممكن أفضل طول اليوم من غير أكل خالص ومش أحس بجوع وده سبب خناقاتى مع ماما إنى يعنى مش بأكل وساعات بأكل مع صحابى علشان بيشجعونى على الاكل وعلشان هما بيجوعوا كتير اوى فبضطر آكل معاهم
2- عبر لنا عن شعورك عندما تلقيت الدعوة ؟؟
طبعا مبسوطه جدااااا لأنى هأتعشى مع صحابى وخاصه مريم علشان انا بحبها والله فعلا
3_ هل أنت من الأشخاص الذين يفضلون كثرة العزائم بالمطاعمـ ؟؟
لا انا بحب البيت جداا وأكل البيت وخصوصا لما أكون انا اللى عملاه وده نادرا ما بيحصل ههههه بس ده ميمنعش يعنى انى مش بحب اخرج لا ده انا بحب الخروج جدااا مع صحابى او مع اخواتى او مع ماما بس اللى مش بحبه انى أكل بره البيت أيا كان المكان اللى هنأكل فيه
4_ماذا تحب عادةً أن تتطلب عندما يُترك لك الأختيار في طلب العشاء ؟؟
اممممم
مش حاجه معينه انا بأكل كل حاجه وحاجات قليله اوى اللى مش بحبها وبعود نفسى دلوقتى إنى أكلها
5_ عبر لي في 3 كلمات من تكون أنت ؟؟
دراسه وصداقه وحب
6_ هل مازلت الي الأن تسعي في الوصول الي حلمك أم انة قد تحقق ؟؟
لحد دلوقتى اتحققت احلام بسيطه كانت مجرد افكار وكبرت فى يوم الايام وبقت احلام والحمدلله اتحققت بس لسه الحلم الاكبر اللى انا مستنياه بقالى كتيييير وشكله قرب اهه هههههههه ياااارب يكمل لحد الاخر علشان لو مكملش انا هيحصلى حاجه
7_ هل لك قوانين وأنت على سفرة الطعام كائن تبدأ بشيء معين وتنتهي بشيْ معين آخر ؟؟
طبعا ببدأ بسم الله وأكل باليمين ومن اللى قدامى بس المهم انى اكون بتفرج على حاجه او بعمل حاجه وانا بأكل علشان مأزهقش وانا بحب الساندويتشات جدااا عن الاكل العادى لانها بتبقى معايا فى كل مكان يعنى مش هأبقى قاعده فى حته معينه علشان أخلص أكل وأقوم
8_هل هناك طبق اساسي لأبد ان يوجد في وجبة طعامك ؟؟
لا عادى انا بأكل كل حاجه ومعنديش حاجه مفضله او لازم تكون موجوده (شوفتوا قنوعه ازاى
)
9_ هل تعتبر نفسك محظوظ في الحياة ؟؟
الحمدلله إلى حد ما لأنى انا شايفه الحظ بيبقى فى الأهل والصحاب والناس التانيه
والحمدلله انا بحمد ربنا كل شويه انى جيت فى عيله زى عيلتى دى(والله مش غرور ولا اى كلام وخلاص) ناس علمونى يعنى ايه مبادئ وازاى اتمسك بيها فى الوقت الى بتكون معظم الناس اتخلت عنها فيه وعلمونى يعنى ايه صح ويعنى ايه غلط وازاى افكر وازاى اعامل اللى اكبر منى وازاى احترمه وكمان ازاى اعامل الصغير واخليه يحترمنى وان ده حلال وده حرام وفين الطريق الصح المنور اللى امشى فيه وابعد عن الطريق المظلم اللى كله بلاوى ومصايب (ربنا يكفينا ويكفيكم شره) وعلمونى يعنى ايه عيله واهل والاسس والقيم اللى اربى عليها ولادى وازاى انشأهم نشأه اسلاميه صح ترضى ربنا (الكلام ده فى المستقبل ان شاء الله) وعلمونى كمان انى احب كل الناس ومأتعلمتش اكره حد والله وان كنت ببقى زعلانه او متضايقه من موقف ما حصل بس بعدها والله بنسى كل اللى حصل وكأن شيئا لم يكن أما صحابى بقى فدول طبعا من أجمل وأحسن الصحاب اللى ممكن تقابلهم فى يوم وبجد مش كلام هما دول الصحاب اللى بجد بتلاقيهم فى وقت الشده قبل الفرح, تقدر تحكيلهم على اللى مضايقك يخرجوك منه واللى مفرحك يعيشوه معاك ويعيشوهولك صح كما ينبغى يعنى ويسألوا عليك وتحس انه فى حد انت مهم بالنسبه له ربنا يخليكم ليا ياااارب ومنبعدش عن بعض ابداا
أما بقى بالنسبه للناس التانيه
فربنا يستر ههههههه (معلش اتكلمت كتير )
10_ هل قمت من قبل بإعداد طبق بنفسك وماهو ؟؟
اه مرة واحده وبس وكانت فى رمضان فقلت بقى ايه أعملهم حاجه يحلوا بيها بعد الفطار وللأسف مفكرتش انها ممكن تاخد وقت منى فى عمايلها يعنى كان المفروض اعملها قبل الفطار علشان يفطروا واجيبها دايركت بس اللى حصل غير كده خالص وهو انى فكرت فى انى لما اعملهالهم بعد الفطار هتبقى سخنه وطعمها هيبقى اجمل فخليتها لبعد الفطار وهى اصلا نوع من الحلويات عامل زى الكرواسون كده بس على اصغر وبيتحط عليه سيرب (العسل بتاع الحلويات) وهى اصلا عجينه انا اللى بعملها وبعدين بسيبها تتخمر الاول وبتتحط فى الفرن وحاجات كده, انا بقى نسيت كل ده وقررت انى هعملها بعد الفطار يعنى بعد الفطار وخلاص قررت وفعلا فطرنا وخلاص وجه وقت الشغل.....
دخلت المطبخ وبقيت اقابل صدمه صدمه لما عرفت انى لسه هعمل عجينه وهسيبها تتخمر وبعدين هتتحط فى الفرن وانا كنت قايلالهم بقى انى هعملهم حاجه جامده موووت اجمل من اللى ماما بتعمله بمراحل فكله بقى مستنى اللى هيطلع وبالأخص ماما ههههههه المهم دخلت عملتها وسيبتها تتخمر هو انا المفروض اسيبها نص ساعه رحت انا سيبتها ساعه كامله (لانى نسيتها اساسا وكنت بتفرج على مسلسلات وبرامج رمضان
) وكنت كمان حاطه عليها مقدار من الخميره اكبر من المطلوب طبعا وعرفت بعدين انه يكفى لعمل 5 كيلو عجينه!!!!!! واللى انا كنت عملاها متكملش نص كيلو لأنى كنت بجرب مش أكتر ولما بدأ الشغل بقى وجيت أشوف شكلها اتخضيت لقيتها حاجه ضخمه جداا وكتيره اوى فقلت حلو علشان ناكل براحتنا بقى (كان مجرد تفكير بينى وبين نفسى) المصيبه بقى هنا كانت فى ايه؟؟؟ على ما عملت ورحت وجيت وطلعتها وكده كانت الساعه بقى واحده الصبح وكلهم ناموا!!!!! ما عدا بابا (الله يكرمه والله هو اللى انقذنى) فقلتله ع المصيبه اللى انا فيها وانى مش عارفه اتصرف لأنها كبرت اوى وبقت كتيرة راح يا حرام ملقاش حل غير انه يساعدنى وفضلنا انا وهو شغالين فيها ساعه كامله وانا زهقت وسيبته هو يكملها ههههههه, هى صعوبه الموضوع فى انها بتتعمل على شكل كرواسون واللفه بتاعه متعبه جدا ولازم تكون مظبوطه علشان لو شكلها مش حلو محدش طبعا هيرضى يأكلها وهأتدبس فيها انا وبابا ههههههه بس عملناها وخلصناها بعد ساعه وشويه وبقت جاهزة على السحور
وبجد والله على اد التعب اللى تعبته انا وبابا على اد ما كانت جميله اوى وان شاء الله تجربوها ممكن نطلع رحله سوا كلنا وأعملهالكم
11_ أأنت من الناس التي لأ بد ان تتحدث على الطعام ؟؟
جدااا انا مبعرفش أكل وانا ساكته ابدااا يعنى لو ماإتكلمتش ممكن اسمع حاجه المهم يكون فى صوت جنبى وخلاص
12_ تهتم بِ أمر التَجمع على مائدة الطعام ؟؟
اه طبعا لأ بابا عودنا على كده من زمان اننا كلنا لازم نكون مع بعض ونستنى بعض الترابط فى كل حاجه مهم برده يا جماعه
13_هل تهتم بِ امرالتحلية بعد الطعام ؟ وماهي افضل انواع الحلويات لديك ؟؟
لا انا مش بحب الحلويات اوى ومش بتفرق معايا خالص انا بس بجرب فيهم فى البيت ومش بأكلها
14-هل صادفت مرة أكلت طعام ولم يعجبك ولكن أكلته فقط مجاملة لصاحبه ؟؟
للأسف مجتش الفرصه وان شاء الله متجيش لان الاكل ده هو الحاجه الوحيده اللى لو مش عاجبنى مقدرش حتى ابص ليه
15_ ما يشد دائما انتباهك جودة الطاعم المقٌدم أم شكل المكان المدعو إلـيه ؟؟
هو اللى بيشدنى بصراحه الشخص اللى عازمنى على العشا ده هههههه والا مكنتش هروح معاها صح؟؟؟ والمكان طبعا بس المكان بعد الشخص يعنى تانى حاجه ابص لها هى المكان
فقد استمعت أنا معك بِ هذهـ الدعوة وأنت ماهو شعورك بعد هذه الدعوة ؟؟
انا مبسوطه موووووووووت انى اتكلمت معاكى وحاسه انى اكتسبت صديقه جامده جداااا وبجد العشا كان هايل ميرسى جدااا على الدعوة الجميله والمرة الجايه هتبقى عندى انا ان شاء الله
هل تحب أن تكرر التجربة مرة أخرى ؟؟
يااااااااريت بس المرة الجايه تبقى عندى انا ان شاء الله ونكون كلنا قاعدين مع بعض ويبقى بجد وياااارب مكونش ضيفه تقيله على قلبكم وميرسى مرة تانيه على الدعوة يا مريومه