اتيكيت للبنات وبس

اتيكيت الضيافة

لو كنتي معزومة عند بنات اصحابك او ناس قرايبك في نفس المحافظة مثلا او في بلد تانية غير اللي انتي مقيمة فيها عشان تقضي اجازة معاهم في مدينة ساحلية او حتى قرية من القرى السياحية
او حتى لو كان في ضيوف جايين يقيموا عندك كام يوم سواء قرايبك او بنات اصحابك ففي اتيكيت وسلوك معين لازم تتبعيه لما تكوني معاهم :

* اول حاجة المفروض البنات ماتخدش هدوم كتير جدا معاها واشياء ملهاش لازمة لانك رايحة تقضي اجازة مش تشاركي في عرض ازياء .
* لازم تعرفي عادات الناس اللي انتي رايحة تقعدي معاهم وتكيفي نفسك عليها فلو كانوا غاويين يسهروا مثلا و يصحوا الصبح متأخر حاولي تكوني معاهم او اشغلي وقتك لو متعودة تصحي بدري بالقراءة او بالرياضة او الفرجة على التليفزيون لحد ما يصحوا .

* ماتقترحيش برنامج او خروجة عشان تقضي الاجازة فوق طاقتهم وراعي امكانياتهم المادية كمان عشان ماينزعجوش منك ويتمنوا تروحي بسرعة .
* لازم تتعودي تخدمي نفسك بنفسك وما تستنيش اهل البيت يخدموكي ويعملولك كل حاجة عشان كده هايحسوا انك ضيفة تقيلة .

* ما تدخليش فيما لا يعنيكي الا اذا حد طلب منك نصيحة او سألك عن رأيك و مشورتك .

* للبيوت اسرار لازم تراعيها ، فمش مسموح انك تقومي بتفتيش الاوضة اللي مخصصينها لاقامتك سواء وهو موجودين او مش موجودين ، ولو كان في دولاب مقفول فمش مسموح انك تفتحيه.

* ما تحاوليش تغيري نظام المكان وافتكري انك ضيفة فيه وهاتمشي منه بعد فترة.

* ما تقعديش في الحمام فترات طويلة وافتكري ان في ناس تانية مقيمة في نفس البيت وكمان بيحتاجوا يدخلوا الحمام .

* بعد انتهاء الزيارة رتبي الاوضة اللي كنتي قاعدة فيها ونضفيها زي ما كانت لان ده تصرف راقي و متحضر .

* وانتي ماشية لازم تشكري الناس اللي كنتي عندهم وتدعيهم انه يزوروكي كمان كرد للدعوة .

اما لو كنتي انتي صاحبة البيت وجايلك ضيوف فلازم تستقبليهم استقبال حار وبحفاوة وتستعدي وتجهزي بيتك قبلها لاستقبال الضيوف عشان يكونوا مرتاحين عندك .[i]

موضوع هايل يا انوس انا بحب جدا اى حاجه خاصه بالاتيكيت
وان شاء الله كل الى اتعلمته فيه هحطه هنا ان شاء الله

ميرسى يامرمر وانا ان شاء الله معاكى ولو عاوزة هجيبلك كل حاجه خاصه بالاتيكيت من عيونى ياعيونى

مرسي يانوووس ع الموضوع الجميل

دستتت درد نكنه