يا ريت نقلد زينب وريم

السلام عليكم: أنا بأحيي مجهودات زينب على وقوفها المستمر على أخبار الدولة التي هتدخل تخصصها وطبعا أنتوا عارفين إني بأقرأ التوبيكات فقط ومش باقرأ التفاصيل عشان انتوا عارفين موقفي من هذه الدولة السرطانية. ولكن الأخوة مصطفى وطارق غرقانين في العسل والنكت والرومانسية ولا بيجيبوا خبر واحد عن اسرائيل أو حتى فلسطين بلاش تدخلوا مواقع بالعبري عشان نعرف اخبارهم كفاية نعرف اخبارهم بالعربي. وكمان فين مجهودات جوليانا في اللغة العبرية وقراءة التوراة زي الأخت ريم وعلى فكرة انتوا السنة الجاية ان شاء الله هتذاكروا العهد القديم كله في الكلية فأبدأوا بيه من دلوقتي. يا ريت نقلد زينب ونجيب اخبار عن دولة التخصص ونقرأ التوراة ونحللها زي ريم ولا هندخل عبري بالاسم وخلاص؟ ردوا عليا.
عادل إبراهيم

شكرا د\ عادل

والحمد لله اني بعمل حاجه كويسه

وعجبت حضرتك

اشكرك دكتر عادل علي شهادة حضرتك ليا ولمجهودي ودي شهادة اعتز بيها
شكرا للمرة التانية

شكرا دكتور عادل على تشجيعك لزينب و ريم
و بصراحة هم يستهلوا
بس يا تري من وجهة نظر حضرتك
هل الانسان لما ياخد موقف من سياسة دولة
يمتنع عن قراءة اخبارها؟
و هل تشجيعك على قراءة اخبار اسرائيل ده معناه تشجيع سياستها؟
بيتهيقلى المعرفة و العلم ملهومش وطن
ممكن يكون الموضوع خارج اهتمامات حضرتك
لاكن إن البعد يكون سببه الاساسي الاختلاف مع هذه الدولة السرطانية؟؟؟؟؟؟
اتمني التوضيح

بعتذر جدا عن عدم مشاركتى فى المنتدى الفترة اللى فاتت لاننى كنت فى مصيف وان شاء الله هكمل قرائتى للتوراة وتحليلها والعهد القديم واللغة العبرية وشكرا لتنبيه حضرتك لينا وتشجيع زينب وريم هما يستاهلوا بجد مجهودهم رائع

ميرسي يا دكتور عادل على نصائح وتوجيهات حضرتك
بس أحب أقولك أن كل أنسان وله أولوياته وميوله ومواضيعه
وإذا كنت لا أكتب كثيراً عن إسرائيل وأخبارها وذلك لأنى لا أفضل سياستها
وإذا كنت هتخصص عبرى فلأنى أحب اللغات وخاصة اللغات النادرة وحابب العبرية جداً
ولأن العلم ثقافة ومعرفة فأنا أعرف ولو القليل عن هذة الدولة ولغتها وسياستها وأخبارها
ولكن ربما تكون هذة النصائح والتوجيهات تغيير لنقطة سلبية فى كتاباتى ومقالاتى
وأوعد حضرتك وجميع الأعضاء بالكتابة عن إسرائيل وأخبارها وأحاول أن أكتب عن اليهودية
ولو بموضوعات بسيطة وذلك نظراً لمعرفتى القليلة بهذة الدولة كبيرة سياسياً ودولياً
وطبعاً بمساعدة حضرتك ومعلوماتك وثقافتك العظيمة عن إسرائيل وتاريخها وسياستها وديانتها
وأتمنى من حضرتك التشجيع فى جميع الموضوعات وأمداد المنتدى بالمواضيع عن إسرائيل وغيرها من الموضوعات العامة التى لم تعد مثل المواضيع السابقة وكتاباتك المفيدة ؛
وأتمنى ان أكون دائماً عند حسن ظنكوا
ولحضرتك جزيل الشكر والأحترام والتقدير لوجهة النظر والنقد الأيجابى
وبالله التوفيق .

طبعا الشكر كل الشكر لزينب وريم وفعلا مجهود جميل منهم

د / عادل

المنتدى فى الللحظة اللى بكتب فيها دى عدد اعضاؤه 70

معتقدش انه كان من الانسب تحديد اسمين ( طارق ومصطفى )

وعلى العموم حضرتك ارجع لمواضيعى وشوف كام واحد منها بيفيد الناس بجد وكام واحد لأ

كل موضوع وليه مجهوده وانا تم تكليفى بقسم الكمبيوتر ودا على فكرة اصعب قسم للاشراف عليه ومحاولة طرح موضوع فيه بتاخد مجهود كبير جدا

معتقدش ان دى حاجة قليلة او يستهان بيها ولو على اخبار اسرائيل فاوك انا اسهل ما عليا الاخبار والتقارير

والله اسهل كتير من رفع برنامج وشرحه والبحث عن اخر اصدار ليه

شكرا دكتور عادل على تشجيعك لريم وزينب بس احب اوضح لحضرتك ان مصطفى وطارق لو مكانوش مهتمين بالاخبار الاسرائيلية بس هما اكيد ليهم مواضيع كتير مفيدة وخاصة طارق واذا كانت موضوعاتهم البعض منها عن الرومانسية والنكت فا ده مطلوب لان لو المنتدى كله اخبار فى اخبار محدش هيدخل والناس هتزهق وده كان سبب انى اعمل اقسام عامة فى المنتدى عشان يبقى بجانب العلم ترفيه برده ده رايى

وفى حاجه لفتت انتباهى حضرتك وصفت ايران بالدولة السرطانية وان حضرتك مش بتابع مواضيعها لهذا السبب واعتقد ان ده ملوش علاقة
طيب وماذا عن اسرائيل وهى تعتبر اسوء سياسة على مستوى العالم من وجهه نظرى ومن وجهه نظر ناس كتير طيب ايه مش فاهمة حضرتك ممكن توضح لنا وجهه نظرك

السلام عليكم: أشكركم على هذه الردود وأريد توضيح بعض النقاط ، عندما قصدت تحرك مصطفى أو طارق أو جوليانا لتتبع أخبار دولة التخصص في العبري فكان قصدي إنهم هيتخصصوا عبري وفي معلومة بسيطة أحب أنهم يعرفوها هم وكل اللي هيدخلوا عبري إن اللي ما يعرفش ولو 50 % من مجتمع اسرائيل من الداخل أو سياسته الداخلية والخارجية فسيكون محلك سر في القسم وهيكون طالب عادي بيذاكر عشان ينجح وبس ولكن اللي بيحب يكون متميز فيتابع سياسة هذه الدولة ومصطلحات ومفاهيم مكتوبة داخل الصحف العبرية وفيما بعد يتعرف على مفاهيم الأدب العبري هؤلاء الناس لا يكتبون كلمة بدون ان يكون لها مغزى أو إسقاط فإذا لم أحاول أن اكتشفهم فأنا طالب عادي ولكن مع اكتشافهم من خلالهم فأنا طالب متميز ومثقف . النقطة الثانية فهى موقفي من الدولة السرطانية أنا أتابع أخبارها بالفعل والتحليلات السياسية الخاصة بها ولكن من خلال الصحف المصرية وأنا لي أصدقاء سافروا اليها وأعرف الشكل الداخلي لها منهم فإذا كانت هي دولة سرطانية لا تعجبني سياستها فكذلك لا تعجبني سياسة الدولة العبرية ولكن أنا اتعرف عليها من الداخل ومن الخارج حماية لي ولغيري من اداعاءاتهم ومن ابواق السياسة الصهيونية لهم التي يروجون لها في كل مكان ونحن نصدق عليها فنحن مثلا نقول مثلهم البلاد أو جيش الدفاع أو وزارة الدفاع كيف ذلك يجب أن نعرف مصطلحاتهم ونترجمها على أنهم دولة محتلة . وإذا كنا لا نتتبع اخبارها وسياستها ونحب اللغة العبرية فقط فلن نتقدم في معرفتنا ابدا لأن أهل اللغة هم سكان هذه الدولة ولا يخفى عليكم أن بها عرب مسلمون يحملون جنسيتها فهل كل هؤلاء العرب المسلمون تعجبهم سياسة إسرائيل وكيف هو شكل المجتمع من الداخل وفيهم جنسيات مختلفة تعالوا نتعرف أولا على شكلها من الداخل ثم نتحدث عن عناصر هذا المجتمع والتناقضات الذي به حتى نعرف كيف هم يتعاملون مع العرب ومع الفلسطينيين في داخل اسرائيل وفي خارجها. وشكرا مرة أخرى لردودكم وصدقوني لا بد من الاهتمام بذلك.
عادل إبراهيم

مرسى دكتور عادل على التوضيح وانت فعلا عندك حق فى كل كلمة