اول دروس المطبخ مع الشيف انوووووس

حبايبى الحلوين النهارده اول دروس المطبخ لأنى شاكه فى ان معظمكن مش بيعرف يعمل حاجه فى المطبخ زييى بالضبط بس انا بجد بدأت اقعد قدام قنوات الطبخ واكتب الاكلات اللى بيعملوها وتقريبا خلصت اجنده صغيرة كده على قدى وكتبت فيها الوصفات اللى عجبتنى واللى ممكن نعملها من غير ما نتعب نفسنا خااااااااالص والنهارده ان شاء الله كبدايه هقولكم على اكله سهله فى تحضيرها وبسيطه فى مكوناتها ومش هتاخد وقت وتنفع حلو وتنفع حادق وطعمها حلو جدا وهى الكريب
انا جربتها وعملتها مرة حلو ومرة حادق والله وطلعت هايله بجد
معلش طولت عليكوا فيللا بينا نبدأ نقول قبل ماتزهقوا يللا:

المقادير:
3 بيضات
2 كوبايه لبن
2 كوبايه دقيق وبس

الطريقه:
هنخلط المكونات دى كلها مع بعض كويس ونخلى بالنا انه ميبقاش فيها تكتلات وتبقى ناعمه وبعد ما نخلطها كويس نحطها فى التلاجه ترتاح حوالى نص ساعه وبعدين نطلعها ونجيب طاسه تيفال صغيرة او كبيرة زى ما تحبى بس تبقى تيفال علشان بس العجينه متلزقش فيها ونحط فيها معلقه زيت واحده بس ونوصل الزيت لكل ركن فى الطاسه وناخد مغرفه من الخليط ونحطها فى الطاسه ونعمل معاها زى ما عملنا مع الزيت بالضبط يعنى نوصلها لكل ركن بحيث انها تاخد شكل دايرة ونكملها لو لقينا فيها فراغات صغيره كده ونستنى دقيقه واحده بالضبط وبعدين نقلبها على الناحيه التانيه ونسيبها برده كمان دقيقه واحده وبعدين نطلعها لما لونها يبقى دهبى اوعوا تسيبوها لحد ما تتحرق خدوا بالكم وخليكوا واقفين جنبها
وبعد كده تيجى اهم خطوة اللى هى الحشو لو عاوزة تحشيها جبنه بالزعتر تعملى ايه بقى
تفردى الكريبايه وتحطى فيها معلقه جبنه وتلفيها زى الرول وترصيها فى طبق وتعملى كذا واحده منها وممكن تحطى على الوش بقدونس او اى حاجه خضره للتزيين ده لو عاوزاها حادقه
اما بقى لو عوزاها حلوة ممكن تحشيها مربى وبنفس الطريقه تفرديها وتفردى عليها معلقه مربى وممكن قطع فاكهه لو تحبى وتلفيها وترصيها فى طبق وتزينيها بقطع الفاكهه زى كده


وكده خلصت الاكله وبألف هنا وصحه وياريت يا بنات تجربوها وتقولولى والله حلوة جدااا وسهله جدااا جدااا ولو عجبكم الموضوع انا ممكن اجيبلكم اكلات اسهل بكتييييير بس حد فيكم يقول واى خدمه وانا تحت امركم فى اى حاجه

اه نسيت اقولكم انه ده موقع القناه بتاعه الاكل اللى انا متبعاها اتفرجوا وجربوا وقولولى ايه رأيكم
http://www.fatafeat.com/
متنسوش تردوا وتقولوا رأيكم فى القناه وتدوقونى اللى انتوا عملتوه اوك يللا سلام..

يا يا انوس جيتى على الجرح هههههههه انا مليش فى الطبخ خالص مرسى يا عسل على الوصفة

اولا هو شىء غريب انى ادخل القسم دا طبعا

بس اكيد انتوا مش ممانعين ده . صح ؟

ثانيا بقى وندخل فى الشىء الاساسى اللى خلانى ادخل

يا ماشاء الله انا عايز بس اعرف هو الجيل اللى طالع كله كدة هيتعلم مطبخ من النت

والله يا جماعة دى مشكلة بجد ازاى يعنى اغلبية الجيل كدة ههههههههههههههههههههههههه

وبعدين مانتوا عارفين ان اقرب طريق لقلب الراجل اييييييييييييييييييييه

مش بالزمة احنا الرجالة مظلومين وغلابة ههههههههههههههه

وبالمناسبة بقى الاكل اللى من النت دا مش بيشبع على فكرة ههههههههههههههههههههه

يالا اتعلموا من النت مهو محدش واخد منها حاجة هههههههههههههههههههه

وتقبلوا مرورى بقى ولونى كنت داخل ارخم اساسا هههههههههه

هههههههههههه
ميرسى اوى يا طارق نورت قسم
يا عم براحة علينا شوية بطلو شماتة بقى
وبعدين احنا ناس اهلينا مدلعينا غيران ليه ههههههه
وبعدين مش هيبقى انت وامهاتنا علينا دول مستحلفلنا ناوين يقعدونا فى المطبخ طول الاجازة الكبيرة حتى النوم هيبقى فى المطبخ
مبسوط هههههههه
وموضوع تنفيض البنات للمطبخ نبقى نتناقش فيه ونشوف ايه السبب
غالبا الاسباب معروفة
وابقى ادخل قلنا وجهة نظرك هو التوبيك مش بتاعى بس بجد نورته ونورت القسم

معاكى حق يانورا نورت التوبيك ياطارق ومفيش رخامه ولا حاجه وكويس والله انك دخلت ومفيش مانع طبعا انك تدخل فى اى وقت بس مش فى كل المواضيع وانت اصلا مش داخل علشان تشارك لا سمح الله لأ ده انت داخل تهدى النفوس وتتريأ وتضحك وبس هههههههههه صح؟؟
انا فكرت ادخل التوبيك ده لأنى عارفه ان معظم البنات مش بيعرفوا يعملوا اكل وعلى فكرة انا كمان مليش فى المطبخ ابداااا بس اهى محاوله وابقى عملت اللى عليا ههههههه وانا ان شاء الله هتجوز شيف علشان يرحمنى من الجو ده هههههههههههه وبعدين هو احنا هنقطع نفسنا يعنى هيبقى شغل البيت وكل حاجه فى البيت علينا احنا وبس حتى الطبخ كمان والله احنا المظلومين مش انتوا بس مش مشكله ادينا مستحملين علشان منسمعش كلمتين من اللى انت لسه قايلهم دول وبعدين مهى الحياه مشاركه برده ولا ايه؟؟؟؟
وبعدين يعنى ايه اكل النت مش بيشبع انت جربته قبل كده؟؟؟ هههههههههههههه وعلى فكرة مش عيب ابدا ولا حرام انك تجرب تدخل المطبخ وتعمل حاجه ليك انت وتأكلها لوحدك هههههههههه لأنه معتقدش انه فى حد هيجازف ويدوق ههههههههههه
بجد نورت التوبيك ياطارق بمرورك الجامد كالعاده وممكن نخلى السؤال ده توبيك كامل علشان نتناقش فيه كلنا وبجد بجد نورتنى

ههههههههه بصى يا انوس انا اول ما دخلت وعرفت انك
الشيف حطيت ايدى على قلبى وقلت ربنا يستر
انا عارفه احنا كلنا سن واحد ونفس التفكير ونفس المهارات
المطبخيه فقلقت بس بصراحه لما دخلت التوبيك وشوفت الاكله لقيتها خطيره جدا وبسيطه وبجد ميرسى ليكى موضوع جميل اوى
اما بقى استاذ طارق فهو مش فاهم الخطه بتاعه النت مبدائيا
هو مبيجبش الاكلات الى بتتعمل فى البيت
كله جديد فى جديد ده مفيد لينا فى ايه فى التغطيه طبعا
يعنى لو واحده فينا فكرت تطبخ الاكل العادى هيبقى طعمه
مالوف للبيت وهيقدروا يحدووا اذا كان وحش ولا لا انما لما
يبقى الاكله جديده هيبقى طعمها برده جديد ومش هيقدروا
يحددوا احنا عاكين فى ايه ولا ناقص ايه. دماغ برده ههههههههههههههههههههههههه

ميرسى ياملوكه على المرور ياحبى والحمدلله انها عجبتك بس انتى مقولتيش انتى جربتيها ولا لأ؟؟؟؟ ربنا يستر وتكونى جربتيها وتكون عجبتك
ويا مرمر ميرسى ليكى اولا على ثقتك فى مهاراتى المطبخيه ههههههههه وعلى مرورك طبعا وعلى كلامك الجامد الصح 100% بالنسبه يعنى لتعليقك على كلام طارق وان احنا اساسا مش بنحب نعمل الاكلات التقليديه دى احنا على طول نيو ههههههههههههه