تكلم ....حتى أراك

بسم الله الرحمن الرحيم
اذيكم اخواتى يارب تكونوا بخير
انا عندى فكرة موضوع جميلة حبيت اعرضها على حضراتكم يمكن تعجبكم ونتشارك فيها واهى تقربنا من بعضنا اكتر
ونتعرف على بعض من خلال طرح افكارنا وطرق تفكيرنا فى الموضوعات المطروحة
اولا اسم الموضوع (تكلم حتى أراك)
وللعلم دى مقولة للامام على (رضى الله عنة)
ومناسبتها انة كان جالس فى مجلس يتكلم فية الجميع عدا رجل واحد فقال لة الامام على (رضى الله عنة)
تكلم حتى اراك فان المرئ مخبوء وراء لسانة
ومعنى العبارة(انة انت متقدرشى تعرف الى قدامك الا لو اتكلم وافصح عن داخلة وتفكيرة وتعاطية للمواقف والامور)
كانة بيقول انا شايف كل الناس لانهم اتكلموا لكن انت مش شايفك اتكلم علشان اقدر اشوفك
*******************************
اما الفكرة الى حنعملها حتكون عبارة عن طرح موضوع من خمسة اسئلة
الاسئلة عبارة عن اى استفسار طرا فى بالك
سوال نفسك تعرف راية الناس فية اية
اقتراح وعايز تعرف اية مشاركة الناس فية
وجهة نظر معينة وعايز تشوف وجهات نظر الاخرين..........................الخ
وعلى كل عضو حابب يشارك يضيف ردة الخاص على الاسئلة دى
طبعا بعد ما يعرفنا اسمة الحقيقى ان امكن اونبذة مختصرة عنة
ولو عايز يضيف سوال بدون المشاركة فى الموضوع المطروح دة ممكن
ولة مطلق الحرية فى التعبير عن راية او وجهة نظرة فى الموضوعات المطروحة(الاسئلة المطروحة)
علشان النظام كل واحد حيبعت نص السوال الى عايز يطرحة هنا ف التوبيك او ترسولها عندي
وانا حجمع الاسئلة وحنزلها باسم اصحابها(الاسئلة المطروحة فى الحلقة الواحدة 5 اسئلة مبدئيا)
قابلة للزيادة على حسب أراء المشاركين
واذا جتلى اسئلة اكتر حنرحلهم على اليوم الى بعدة بنفس ترتيب وصولهم ليا
طبعا مع الوضع فى الاعتبار الالتزام بقوانين المنتدى
وبالنسبة للاسئلة حتكون مفتوحة يعنى اسئلة عامة فى اى مجال العضو يختارة(طبعا بعيدا عن الاسئلة الشخصية)
ودة حيعرفنا طبعا على الافكار المتباينة للاعضاء وفى تعاطيهم للموضوعات المطروحة
ان شاء الله الموضوع يعجب حضراتكم
ملحوظة(الفكرة بتاعتى ومش موجودة فى اى مكان ومش منقولة من اى مكان)
ارجو انى انا اكون قدرت اوصل الموضوع لحضراتكم
وكل سنة وانتوا طيبين
************************************************** *******************************************
الحلقة الاولى
دى مجموعة من الاسئلة الى مطلوب ان كل واحد يبدى رأية فيها بصراحة ووضوح
السوال الاول
هل دايما المعرفة بتكون مطلوبة ولا احيانا عدم المعرفة (الجهل) بيكون راحة ونعمة كبيرة؟
السوال الثانى
لية ممكن فى لحظة تحس انك لوحدك مع انة فى ناس كتير حوليك؟
السوال الثالث
لية فى حاجات كتير عارفين انها غلط مع ذلك بنعملها واحيانا بنصر على اننا نعملها؟
السوال الرابع
ممكن ترتبط ببنت ليها ماضى؟ممكن ترتبطى بولد لة ماضى؟
السوال الخامس (نفسى اعرف ايجابتة)
لية البنات فى حاجة بتحبها جدا وحاجة بتكرهها جدا
بتحب الدباديب قوى؟
وبتكرة تقول سنها الحقيقى؟

فكرة جمييله يارورو وفعلا هتقربنا من بعض جداا بس انا عندى سؤال
هو الأسئله بس هى اللى هتتعبتلك على الأكونت بتاعك ولا الإجابات كمان يعنى انا لو عاوزة أجاوب على الأسئله اللى انتى جبتيها دى أبعتلك الإجابات ولا أجاوب هنا ولو عندى أسئله أبعتهالك ولا إيه
معلش غبيه انا شويه

لالالالالا العفو ياحبيتى
انا اقصد ان لما نخلص ال 5 اسئلة اللي انا سئلتكوا فيها وطبعا مع ردكم ونخلصهم خالص
انتوا تفكروا ف اسئلة تانية وتبعتوها عندي او خلاص تبقي هنا ف التوبيك
ولا انتي اية رايك ياانوس وطبعا كل اصحابنا؟؟؟؟
ولما نخلص المناقشة دى هنعمل اسئلة تانيةوكدة يعنى تفاعل اكتر ......محبة اكتر

اشكرك يا روميساء على الفكرة وانا اول واحده هجاوب معاكى وده يشرفنى
*******************************************
الحلقة الاولىدى مجموعة من الاسئلة الى مطلوب ان كل واحد يبدى رأية فيها بصراحة ووضوحالسوال الاول


هل دايما المعرفة بتكون مطلوبة ولا احيانا عدم المعرفة (الجهل) بيكون راحة ونعمة كبيرة؟

لا انا افضل المعرفة طبعا لان الجهل ده حاجه وحشة جدا يعنى افضل المعرفة او الحقيقة حتى لو كانت مرة عن الجهل لان الجهل امر بكتير لما اللى قدامك كلهم يبقوا فاهمين وانت الوحيد اللى مش فاهم ده بتبقى حاجه وحشة جداااا فانا بفضل المعرفة حتى لو كانت هتجيب وجع دماغ
السوال الثانى

لية ممكن فى لحظة تحس انك لوحدك مع انة فى ناس كتير حوليك؟
ده بقى بيحصل كتير ولاسباب اكتر منها ان مثلا اللى قدامك يكون مش فاهمك او انت جواك حاجة مش قايل عليها لحد او حاسس بالغربة وسطهم او يكونوا ناس غريبة عنك او مفيش اهتمام منهم ليك السوال الثالث
لية فى حاجات كتير عارفين انها غلط مع ذلك بنعملها واحيانا بنصر على اننا نعملها؟
ده بقى فى رايى عدم القدرة على قيادة الذات والتغلب عليها وحكمها فى ان ده غلط وده صح
السوال الرابع
ممكن ترتبط ببنت ليها ماضى؟ممكن ترتبطى بولد لة ماضى؟
والله ده هيكون متوقف عالشخص اللى قدامى اذا كان شخص سوى ومحترم والماضضى بتاعه مفيش اى حاجة غلط مفيش اى حاجه تمنع كمان انا مكنتش موجودة فالماضى يبقى مش حقى ان احاسبه عليه
السوال الخامس (نفسى اعرف ايجابتة)
لية البنات فى حاجة بتحبها جدا وحاجة بتكرهها جدا
بتحب الدباديب قوى؟
وبتكرة تقول سنها الحقيقى؟
اولا البنات بتحب الدباديب لان الدباديب من وجهه نظرى بتعبر عن الرومانسية وان هى شىء لطيف ورقيق اما عن سنها الحقيقة اذا كانت كبيرة فا ده من طبيعة المراة انها مهما تكبر تحب تكون اصغر واجمل

ميرسى ياملوكة ويشرفنى انك اول رد
ونورتى التوبيك بارائك الجميلة وعبرت عن شخصية العقلانية ماشاء الله

مرسى ليكى يا روميساء