يلا نرسم مستقبلنا

وأنا قاعد بفكر بعد ما رجعت من الشغل جت ع بالي شوية أسئلة حبيت أعرف إجابتكم عليها وأعرف كمان من كل واحد أزاي بيفكر وأزاى بيرسم مستقبله وعايش ليه

أحنا عايشين ليه
أحنا بنشتغل ليه
أحنا بندرس ليه
بنتعلم عشان نعيش ولا بنعيش عشان نتعلم
أحنا دخلنا القسم ده ليه
أحنا أخترنا اللغة دى ليه
أحنا لما نتخرج هنعمل أيه
طب هنكمل دراسات ولا هنشتغل ولا هنتجوز
أزاي أختار شريك حياتي وما هى مواصفاته
طب هنتجوز جواز صالونات (تقليدي) ولا حب
أزاى أعيش أنا وأسرتي فى سعادة وأستقرار
وهل الحب والسعادة هيستمروا بعد الزواج ولا المشاغل والمسئوليات هتفرض نفسها
وهل لما نكبر ويبقى عندنا 60 سنة هنبقى راضيين عن اللى عملناه فى حياتنا

وياااارب الكل يعيش فى حياة مليئة بالسعادة والنجاح
وكلكو تحققوا أحلامكم
وأخيراً وليس أخراً أتمنى الإجابة بصراحة وفى رعاية الله

وأنا أول واحد هجاوب ع الأسئلة دى

أنا عايش عشان أستفاد وأتعلم وأنجح وأخد خبرات من كل الناس وأستمتع بحياتي
أما الشغل فهو أهم وأمتع حاجه بالنسبالي لأنى باخد منه حرفة وخبرات وفلوس ومواقف مهمة فى حياتي وعلى الأقل لما حلجة تبوظ فى بيتي أعرف أصلحها عشان كده أشتغلت حاجات كتير
"الدراسة ثقافة" أنا ماشى بالمبدأ ده فى حياتي
وبعشق المقولة الجامدة دي " أحنا بنعيش عشان نتعلم " ودي سمعتها من جدي الله يرحمه
أما عن دخولى القسم ده بذات لأني بحب اللغات ومجموعي مجبش أنجليش فأخترته
وعن اللغة فأنا هختار عبري عشان لغة نادرة شوية وأنا حابب التخصص فى الأستيراتيجيات الإسرائيلية
أنا لما أتخرج هأدى عملى الوطني (الجيش) وبعد كده أشتغل وأوصل لمكانة كويسه وبعد كده أبقى أتجوز عن حب إن شاء الله
أما الحب والسعادة بين الزوجين فهي ترجع إلي التفاهم والأخلاص والأحترام والتضحية والحب أولاً وأخيراً وكل ده هيستمر بفضل الله طالما سفينة الأسرة لها قبطان واحد ومساعده وطفل أو أثنان
أما إجابة أهم وأخر سؤال ده يتوقف على أستمتاعنا بحياتنا من حيث الترفيه والنجاح والسعادة والعقيدة طبعاً وأننا نرضي الله ثم أنفسنا
وبالله التوفيق

شكرا يا مصطفي علي الاسئلة دي وفعلا الاسئلة دي مهمة جدا في حياتنا لان لو كل واحد جاوب عليها بصدق هيعرف هو رايح فين وهيعمل ايه ومستقبله هيكون ايه ..
اما انا عن نفسي فانا عايشة عشان اتعلم وكمان اشتغل وعلمي ده هو اللي بيفرق بيني وبين الحيوان لان ربنا ميزنا بالعقل وكمان ربنا سبحانه وتعالي اقسم بالقلم وأعلي من شأن العلماء
اما الشغل فهو شئ مهم مش عشان نكسب فلوس وخلاص لا عشان نعمر الارض ونفيد بعض يعني المفروض ان العلم والعمل بيكملوا بعض حتي ولو كان العمل او الشغل يعني مش مرتبط بتعليمك يعني لو انت درست حاجه واشتغلت في حاجه برضوا علمك هيكمل عملك ..وكمان الشغل بيكسبك خبرات ممكن متعرفهاش من تعليمك "وانا بحب افرق بين العلم وبين التعليم خصوصا في زمانا ده لان في كتير متعلمين بس معندهمش علم "
اما عن الدراسة فالمفروض اننا بندرس حبا في العلم مش عشان ندخل الجامعه ندور علي عرسان ولا عشان الشباب يروحوا يظبطوا بنات " اسفه اني بقولها بلغة الشباب بس ده الواقع " ومش عشان تبقي الواحده رايحه وجايه من الجامعه ومعاها كشكول في ايدها علامة الجودة ان البت يا عيني مجتهدة واهلها فرحنين بيها واسم النبي صاينها وحارسها بتدرس في الجامعه وهي بتروح الجامعة تقعد علي الرصيف ترغي مع الشباب والبنات وترتب وتخطط هتوقع ده ازاي ولا تقرب للدكتور ده ازاي عشان تستفيد منه واهو يمكن يتجوزها حتي ولو علي مراته او حتي يمكن يعينها واهو الدكتور الابيض ينفع في اليوم الاسود "اصلي بصراحه مفروسه من حال الطلبة خصوصا طلبه الجامعة ونفسي نتكلم في الموضوع ده "احنا مش بندرس عشان كل ده المفروض عشان نتعلم ونبقي بني
أدمين مش حيوانات بتاكل وتشرب وتتجوز
وانا معاك في اننا بنعيش عشان نتعلم لان المفروض نتعلم لاخر نفس في عمرنا وده مش بس بالدراسة ده عن طريق حاجات كتير بتكمل الدراسة زي القراءه مثلا لكن احنا بسم الله ما شاء الله شعب مؤمن بالمثل "بعد ما شاب ودوه الكتاب " !!!!!!!
اما انا دخلت القسم ده ليه؟ مش عارفه هتصدقوني لو قولتلكوا اني دخلته عشان مكنتش اعرفه !!اها دخلته عشان مكنتش اعرفه ..يومها سالت ايه القسم ده قالولي عبري وفارسي واردو وتركي ...قلت دي لغات جميله ،ناس كتير حذروني اني ادخله وان دي لغات ملهاش لازمه ولا شغل بس مهتمتش واللي شدني اكتر اني مكنتش اعرف ايه الفارسي ده ..لاني اعرف العبري ده بتاع اسرائيل معروفه ..اما ايه الفارسي ده ؟؟
وافتكر اني كنت حريصه جدا وملهوفه جدا اني اعرف ايه الفارسي ده وكانت اول محاضره في اول سنه الصبح بدري محاضرة فارسي لدكتر علاء واصريت اني احضرها والكل قالي محدش بينزل ولا حد هيجي بس حضرتها ومن يومها وحبيت الفارسي من اول نظره قصدي من اول محاضرة وافتكر ان كل الدفعه تقريبا مكنتش بتحب الفارسي وانا الوحيده بين اصحابي اللي كنت اقول ده جميل اللاقي كل اللي حواليا يزعق وكنت انا اللي بشرح لاصحابي لان محدش كان فاهم حاجه فيه "طبعا مش اسراء مكنتش لسه اعرفها" وعشان كده كانت دفعاتنا في الفارسي قليله وكمان نصهم كان دخلوا عشان سهل وبيعدوا منه مش حبا فيه وتقريبا كلهم اتخرجوا وبرضوا محدش يعرف ايه الفارسي ده هههههههه والله بجد ناس كتير من اللي اتخرجوا معانا لو سالتهم في الفارسي مش هيتفكر حاجة ولا يمكن حتي يعرف الضمائر والله واسالوا عبير عن حال اللي بيتخرجوا وعلي فكرة ده مش عيب دكاترة ده عيب فيهم هما ..اقسم بالله كان الدكاتره كان بيبقي ناقص انهم يبوسوا ايديهم عشان يذاكروا ولا يحاولوا وكان فاضل ان الدكاتره يدوبوا الفارسي في مايه وشربوه ليهم
ولما اتخرجت قررت اني مش هسيب الفارسي وقررت اني لازم اكمل دراسات عليا حبا في العلم وفي دراسة القسم لكن كنت بسمع كلام من ناس" طبعا مش اهلي الحمد لله" لما يعرفوا اني بكمل دراستي غررررررررررررررريب مثلا يا ختي بلا هم ..ايه وجع القلب ده .. يا مجنووونه ده احنا مصدقنا خلصنا ...وانتي انشالله هتعملي بيها ايه في الاخر هتتجوزي وتقعدي في البيت ..بلا دراسات عليا كفايه الجامعه عشان يجي العريس !!!!!!!!!هو اني ابقي متعلمه او اني ابقي مثقفه ده عيب ؟؟!!واني لما اختار الطريق ده هيكون تمنه اني مرتبطش !!وليه لازم البنت هي اللي تتنازل عن طموحاتها عشان تتجوز !!ليه منقولش للراجل يا اخويا بلا دراسات بلا هم عشان تلاقي عروسه ؟؟ ولا هو لازم البنت هي اللي تكون اقل من الراجل عشان كده هتعرف تتجوز ؟؟
وشغلي الحمد لله ربنا بيكرمني بشغل ترجمه وكمان عندي استعداد اشتغل جنبه اي شغلانه محترمه لانها هتفدني
اما اختيار شريك حياتي فانشالله هيكون اختيار بيعتمد علي القلب والعقل لان مينفعش يعتمد علي واحد منهم بس وكمان لازم يرضي بيا وبطوحاتي ويشجعني يعني يعاملني كانسانه زيي زيه واكيد لازم هو يكون طموح زيي ..ويكون بيثق فيا وبيحترمني ومفيش حاجه اسمها مفيش كرامه في الحب لان لو فيه حب حقيقي بينا اكيد الطرف التاني هيخاف علي كرامتي قبل كرامته
اما جواز الصالونات ده مش بحبه بصراحه بحس انه مساله عرض وطلب يعني واحد يتوسط مثلا ويوصف البضاعه للتاني انها بنت جميله ومتعلمه وكذا وكذا وهو عنده شقه وواد حلو وابن ناس "يعني ايه ابن ناس اومال احنا ولاد ايه ؟؟"ومش هيخليكي عايزه حاجه !!وانت عرفت منين ؟؟ يعني هو عشان معاه فلوس ولا حلو يبقي خلاص طب واحترامه ليا؟ اسلوب حياته؟ وجهة نظره للحياة ؟ مبادئه ايه في الحياة ؟ علاقته ايه بربه؟؟ كل
ده طبعا مش معروف ..كلها احكام ظاهريه
اما سعادة الانسان فهي بتيجي من الرضا بحياته طول ما الانسان راضي هيحس بالسعادة وهيشوف نفسه اسعد واحد ..وسعادة الاسرة بتيجي من الحب والتفاهم والاحترام المتبادل والمشاركة مش لان فيه قبطان واحد للسفينه تاكد انها هتغرق لان المساعد زي مقولت هيجي في الاخر ويتخنق لانه في الحقيقة مش مساعد هو قبطان برضوا وهيحس بظلم وهيحاول ياخد حقه فالقبطان الاولاني هيقوله ماانت سكت من زمان ايه اللي فكرك والتاني هيكون خلاص تعب وحس ان الوقت جه انه يطالب بحقه فهتغرق هتغرق في اي وقت حتي ولو منتهتش بالطلاق الرسمي فممكن يبقي فيه طلاق معنوي
اما بقي اذا عشت ل 60 سنه فانشالله اعتقد يعني اني هكون انشاء الله راضيه عن حياتي لاني تعبت فيها وهاتعب لاخر عمري انشاءالله
والسلام

ميرسي كتيييير ريم وبجد رأيك رأى واحدة فاهمة ومثقفة وعقلانية وعجبتني صراحتك الجامدة
بس مش شرط تجمعى أن كل البنات والشباب داخلين الجامعة يظبطوا عشان أنتي لو فى مدرج مش منتدى كان زمانك مقتولة وده كان هيحصلي بسبب حوار عقلاني وصريح فى أول السنة بس الحمد لله أتعلمت منه حتى أسألي عبير
أما حكاية الثقافة والتعليم فهى من البني أدم نفسه يعني لو حتى التعليم عندنا مش ولابد نتعلم ونتثقف أحنا والمصادر والكتب والمراجع موجودة فى كل حتة فى بلدنا بس يا مين يدور الظاهر أن العيب يا ريم مش فى التعليم ولا فى بلدنا العيب فى العقليات المتخل قصدى المتأخرة اللى بتدور على منهج وأمتحان وبس ونسيوا أن العلم نووووور
وبعدين يا ريم الحب تضحية وأحترام وكرامة يعني أهم حاجة أن الأثنين يحقوا أهدافهم وينجحوا فى حياتهم ويعيشوا حياة مستقرة ولكن متنسيش أن الراجل راجل والست ست يعني مينفعش أن الست هى اللى تحكم البيت والراجل ينظف ويطبخ ويرضع وكمان السفينة لو بقبطانين هتغرق ولا أييييه
والسلام ختام

مرسی یا مصطفی علی ردک وانا مش بجمع ان کل الطلبه کده بس النسبه عالیه جدا یامصطفی وبصوره بشعه ودی کارثه حقیقیه یعنی مثلا لما دفعه تتخرج مثلا 60 واحد واللی یبقی نافع فیهم حوالی 4 ده یبقی ایه ؟؟؟ المشکله بتکبر کل یوم والحال بیدهور المشکله اننا بنرجع بسرعه جدا والمشکله الکبیره ان البرکه فی الشباب یعنی الشباب لو اضرب یبقی علیه العوض والحال مش مبشر بصراحه یمکن احنا اللی بنحب نقلل من الامور ودایما مش بنحسبها صح ...اما موضوع التعلیم والثقافه فانا رایی زی رایک ان الدراسه مش هی اللی هتخلیک انسان واعی ومثقف بدلیل ان فیه خریجین کتیر وکانهم متعلموش ..وانا عارفه ان الکلام ده بیترفض من الطلبه وانا عن نفسی کان لیه مواقف کتیر ومشاکل کتیر مع ناس بسبب الکلام ده وبصراحه مکنش بیهمنی ولا کان یقدر سوری یقتلنی زی مقولت لان ده رایی واللی مش عجبه هو حر واللی سلیم ومش شایف نفسه کده بیزعل لیه من الکلام !!ولا هو اللی علی راسه بطحه ؟؟ یعنی افتکر ان دلیل ان الناس بتزعل من الکلام ده ان ده فعل حقیقی لانک لو شایف حیاتک صح مش هیهمک لو حد کان رایه کده وهتسکت لانک مش منهم والمفروض ان الناس عارفه کده لکن اللی بیثور ویزعل فهو عارف فی قراره نفسه انه منهم وعشان کده بیحاول ینفی التهمه عنه بای شکل ههههههه
المشکله اننا بنبقی عارفین فین المشکله بالظبط وبنتعمد نتجاهلها ..بنضحک علی نفسنا صح ؟
اما بقی یاسیدی موضوع ان الحب تضحیه واحترام کل ده انا معاک فیه بس یکون متبادل یا مصطفی انا مقلتش انی مش مستعده اضحی عشان حد بس هل هو هیضحی زیی ؟ یعنی لما اتکلمت عن موضوع التعلیم لیه البنت هی اللی لازم تضحی بطموحتها یعنی مثلا تلاقی واحد یقول للبنت سیبی دراستک مقابل الارتباط بیه ومیحترمش عقلیتها ویقولها مثلا علی شغل او ان البنت تحقق ذاتها ان ده هبل ؟؟ وفی المقابل هو عایز یحقق مستقبله لا وکمان عایزها هی تساعده طب لیه میبقاش الامر طبیعی نساعد بعض احنا الاتنین انت تکبرنی وانا اکبرک لیه مینفعش ؟ هی معادله صعبه قوی کده ؟!! اومال الاوروبیین بیحققوها ازای وحتی الایرانیین بیقدروا یحققوها ..تعرف ان حالیا کتیر جدا من الشباب الایرانی بیفضل البنات اللی بتکمل دراستها وبیساعدها ..وحکایه ان الراجل راجل والست ست ماشی انا معاک بس هاسالک سوال هو الراجل لو ساعد مراته فی شغل البیت ده عیب فی حقه ؟؟؟ یعنی لو عندهم اطفال وهی مثلا بتشتغل وهو فاضی وعندها حاجه فیها مشکله لما یرعی اطفاله لحد ما نتجز شغلها ؟؟ هما مش ولاده برضوا ولا ایه ؟ ولا هو کل اللی علیه یخلف ویرمی للست ؟؟؟ وملوش دعوه بحاجه ؟ لیه رجاله مصر بتستکبر ده وبتشوف ان ده هیقلل من رجولتهم ؟ مع ان الرسول صلی الله علیه وسلم مکنش کده .. ولا انت شایف ایه ؟
وصدقنی لو السفینه لیها قبطان واحد وهو المسیطر ای کان الطرف المسیطر هو مین یعنی الراجل او الست فی یوم من الایام هتغرق حتی ولو معنویا مش رسمیا لان لازم المشارکه لان دی حیاتکم سوا مش حیاتک لوحدک وفی یوم من الایام الطرف المسیطر علیه هیتخنق مهما استحمل وهتکون العواقب وخیمه وباشکال مختلفه .

بصي يا ريم أولا شعبنا مش بيحب يعرف سلبياته أو بمعنى أصح مش بيحب اللى يقوله على عيوبه ودى أنا لمستها فى كذا حاجه بذات لما قلت وأتكلمت عن عيوب الشباب ومشاكلهم فى محاضرة فى أول السنة وعينك ماتشوف إلا النور هاتك يا تريقه وده مغرور وده متكبر وده زياط وووووو
بس بجد أحسن حاجة تعمليها فى الموقف ده أنك تنفضى لأن ( خير الرد على السفهاء الصمت ) وبعدين طالما أنا واثق فى نفسي وكلامي ومعلوماتي أتحدى أى واحد ينقدني أو يغلطني وعموما أحنا مش هنصلح الكون بس حتي نبدأ بتغيير نفسنا ومجتمعنا
أما حكاية مستقبل البنت فأنا بشجع عمل المرأة جدا ولكن فى حدود معينة لأن البنت إنسانة زي الولد وليها أحلام ومستقبل نفسها تحققه فلازم نشجعها مش نحبطها وممكن تكون حاجة كويسة وتكون أضافة للمجتمع وطالما الأثنين بيشجعوا بعض أكيد هينجحوا وكل واحد هيبقى فخور ومبسوط بنجاح شريك حياته ومن رأيي أن البنت تكمل دراستها حاجه مفيدة ليها ولثقافتها وحتى مركزها الأجتماعى وده أكيد هيأثر فى الأولاد والبيت ومشاكل الحياه وصعوبتها
أما بقا حوار الراجل راجل والست ست أنا متفق معاكى تماما وده اللى لازم يساهم فيه الراجل لو الست مشغولة أو مش موجوده لأن ده دوره فى البيت أنا عن نفسي ساعات بغسل هدومي وأحضر الأكل وأحيانا بنظف الشقه مش قلة من أمى أو أختي ولكن تعودت من أبى على تحمل المسئولية ودى الرجولة بذاتها وده اللى لازم يعمله كل شاب أمال بياخد مصروف وهات وهات وهات ليه من غير فايدة بس اللى بيضايقني ويخنقني يا ريم أن فيه بنات معانا فى الجامعة مبتعرفش تطبخ ولا حتى تغسل طب أزاى بنت وأزاى بعد كام سنة هتبقى ست بيت لازم المسئوليات تبقى متقسمة بين الراجل والست وطالما المساعدة والمشاورة تسود الحياة الزوجية المركب هتمشى بس أنا قصدى بقبطان واحد يعني لازم الراجل يبقى هو صاحب الرأى والكلمة بالمشاورة مع الزوجة طبعا وهو اللى شخصيته أقوى ولازم الرأى يبقى موحد ومتفق عليه فى البيت وإلا الأولاد هيستهتروا بالوالدين وكده المركب بجد ممكن تغرق عشان كده لازم يبقى فيه ديمقراطية وصحوبية بين الوالدين والأبناء وده بيحافظ على سعادة وأستقرار الحياة

اكيد يا مصطفي انا مش بيعجبني النوعية دي من البنات ومش بشجعهم وبصراحة بتخنق منهم لانهم غالبا لا بيبقوا ناجحين في حياتهم العلمية ولا في بيوتهم مش الكل بس الاغلبية ..ومش بحب الست اللي تهمل اولادها عشان شغلها وتبقي هي في وادي وهما في وادي وانا عن نفسي لو حسيت ولقيت ان اولادي هيضيعوا بسبب شغلي هسيبه فورا ..بس الفكرة انه ميكونش اجبار من الراجل لان فيه نوعيات شغل بتكون الست اغلب الوقت في البيت يعني مثلا زي الترجمه بتعمل شغلها في البيت ووقت معين بتسلمه وهكذا يعني اقصد انها تقدر توفق بينهم او انها مثلا لو سابت شغلها عشان اولادها وهما مثلا في مرحلة معينة ولو عدوا المرحلة تقدر ترجع شغلها تاني المهم ان يكون بالاتفاق ومتكنش بالاجبار من الراجل وانه يفهم ان هي عندها اهداف ..والله انا قابلت فلسطينيه في كورس وهي متزوجه وجوزها هو اللي كان بيشجعها عشان تاخد الكورس وكمان عملت الماجستير ودايما بيشجعها وكانت بتروح متاخر ومره الدكتر عمل حوار عن عمل المراه وموافقة الزوج ولما اتكلمت كانت نموذج رائع هي بتساعده في تحقيق ذاته وهو بيساعدها والدكتر سالها عن شغل البيت قالت انه بيساعدها وانها لو مش عامله اكل هتروح هتلاقيه عامل ..وافتكر انها يوم الامتحان قالتلنا انا قلتله انا عندي امتحان وهو طبعا سابها تذاكر طول اليوم وهو قام بشغل البيت كله في اليوم ده وسابها تتصل بزمايلنا تسئلهم في اللي متعرفوش ومنهم كان واحد زميلنا يعني ولد (شوف ثقته فيها ) وفي الاخر كان بيراجع معها وبيطمن انها ذاكرت كويس !!!!عارف ليه يا مصطفي عشان بيحبها بجد وهي كمان ..هو ده الفرق انه اتجوز انسانه باحلامها وطموحاتها ..كل واحد عارف ايه واجباته وفين حقوقه ..هي دي الحياة ..حياة مشتركة